एमालेले सम्झाएपछि सभामुख सापकोटाले अर्थमन्त्रीलाई बोलाए संसद बैठकमा

५ जेठ, काठमाडौं । संघीय संसद अन्तर्गतको प्रतिनिधि सभा बैठकमा बजेटबारे छलफल भइरहेको तर, स्वयम अर्थमन्त्रीनै उपस्थित नभएको भन्दै प्रमुख प्रतिपक्ष दल नेकपा एमालेले प्रश्न उठाएपछि सभामुख अग्निप्रसाद सापकोटाले अर्थमन्त्री जनार्दन शर्मालाई बैठकमा उपस्थित हुन निर्देशन दिएका छन् ।

बुधबारबाट प्रतिनिधिसभा बैठकमा आर्थिक वर्ष २०७९/८० को लागि विनियोजन विधेयकका सिद्धान्त र प्राथमिकता सम्बन्धमामाथिको छलफलमा अर्थमन्त्री शर्मा सहभागी भएका थिएनन् । मंगलबार पेस गरिएको विनियोजन विधेयकका सिद्धान्त र प्राथमिकतामाथि बुधबारदेखि छलफल भइरहेको छ ।

बिहीबार छलफल सुरु भइसक्दा पनि अर्थमन्त्री शर्मा उपस्थित नभएपछि प्रमुख प्रतिपक्षी एमाले संसदीय दलका प्रमुख सचेत विशाल भट्टराईले सभामुख सापकोटाको ध्यानाकर्षण गराए । त्यसपछि सभामुख सापकोटाले अर्थमन्त्री शर्मालाई बैठकमा उपस्थित हुन र उनको अनुपस्थित रहुन्जेलसम्म उपस्थित अन्य मन्त्रीले टिपोट गरेर रिपोर्टिङ गर्न पनि निर्देशन दिए ।

यसपछि छलफलमा सहभागी कांग्रेस सांसद मिनेन्द्र रिजालले पनि अर्थमन्त्री शर्माको अनुपस्थितको विरोध जनाए । बजेटका अन्य प्रत्रियागत विवषयलाई समय नपुग्ने भन्दै यो छलफल आज सकिँदैछ ।