सरकारले अर्थतन्त्रको सुधारका लागि पहल गर्न सकेन्ः भीम रावल

५ जेठ, काठमाडौं । नेकपा एमालेका नेता भीम रावलले सरकारले अर्थतन्त्र सुधारका लागि आवश्यक पहल गर्न नसकेको आरोप लगाएका छन् ।

प्रतिनिधिसभाको बिहीबारको बैठकमा आर्थिक वर्ष २०७९÷८० का लागि विनियोजन विधेयकका सिद्धान्त र प्राथमिकता सम्बन्धको छलफल रावलले यस्तो बताएबका हुन् ।

बैठकमा रावलले अर्थतन्त्रको सुधारका लागि पहल गर्न नखोजेको बताए । उनले कृषि उतपादन र कृषि उत्पादकत्वमा ध्यान नदिइएको जनाउँदै देशभित्रै रोजगारीको अभिवृद्धि गर्न, विदेशी कामदार ल्याउनै नपर्ने व्यवथा गर्न माग गरे ।

रावलले माथिल्लो कर्णालीजस्ता र पश्चिम सेती जलविद्युत ठूला आयोजना आफैँले निर्माण गर्न सुझाव दिँदै भने, ‘सुशासन कायम गर्न सरकारको तर्फबाट विशेष ध्यान दिनुपर्छ ।’

सोही दलका सांसद विशाल भट्टराईले विनियोजन विधेयकका प्राथमिकता र सिद्धान्तका बारेमा छलफल गर्दा अर्थमन्त्री जनार्दन शर्माको उपस्थिति नभएकामा आपत्ति जनाए ।

उनले आपत्ति जनाएपछि सभामुख अग्निप्रसाद सापकोटाले यसबारेमा आफ्नो ध्यानाकर्षण भएको जनाउँदै सम्बन्धित मन्त्रीलाई उपस्थितिका लागि रुलिङ गरे । अर्थमन्त्री नआउँदासम्म सदनमा उपस्थित अन्य मन्त्रीलाई टिपोट गर्न सापकोटाले निर्देशन दिए ।