एमाले उपाध्यक्ष पौडेलको वडा पनि उठायो कांग्रेसले

६ जेठ, बुटवल । बुटवल उपमहानगरपालिका–८ नेकपा एमालेका उपाध्यक्ष एवं पूर्व अर्थमन्त्री विष्णु पौडेलको मतदान गर्ने वडा हो । उक्त वडामा कांग्रेसका उम्मेदवारले अध्यक्षमा नेकपा एमालेका उम्मेदवारलाई पराजित गरेका छन् ।

एमालेका पूर्वनगर कमिटी अध्यक्ष ज्ञानप्रसाद अर्याललाई ३५ मत अन्तरले पछि पार्दै नेपाली कांग्रेसका उम्मेदवार यज्ञप्रसाद पंगेनी सो वडामा विजयी भएका छन् ।

यो वडामा ३ हजार ४३० मत खसेको थियो । यो वडा बुटवलका पूर्व नगर प्रमुख एवं प्रदेश सरकारका पूर्वमन्त्री एमाले नेता भोजप्रसाद श्रेष्ठ, एमालेका स्वर्गीय नेता रामनाथ ढकालको पनि वडा हो । यो वडामा २०४९ सालयता पहिलोपटक नेपाली कांग्रेस विजयी भएको हो ।