सत्ता गठबन्धन र निर्वाचन परिणामबारे कांग्रेसको धारणा सार्वजनिक गर्न ३ बजे पत्रकार सम्मेलन

९ जेठ, काठमाडौं । सत्ता गठबन्धनसँग चुनावी तालमेल गरी स्थानीय तहको निर्वाचनमा गएको नेपाली कांग्रेसले निर्वाचन परिणामबारे पार्टीको धारणा सार्वजनिक गर्ने भएको छ । स्थानीय तह निर्वाचनमा कांग्रेस सबैभन्दा अगाडी आएको छ ।

गठबन्धनसँग भएको चुनावी तालमेल र निर्वाचनमा देखिएको प्रभावकारितामाथि पनि कांग्रेसले समीक्षा गर्ने भएको छ । गठबन्धनलाई निरन्तरता दिने विपषयमा पनि कांग्रेसले आफ्नो धारणा बाहिर ल्याउने बताइएको छ ।

कांग्रेस पार्टी कार्यलयका मुख्य सचिव डाक्टर कृष्णप्रसाद पौडेलका अनुसार सोमबार दिउँसो पत्रकार सम्मेलन गरिँदैछ । वैशाख ३० मा भएको स्थानीय तह निर्वाचन र त्यसको परिणामबारे जानकारी दिन पत्रकार सम्मेलन गर्न लागिएको हो । पत्रकार सम्मेलन दिउँसो ३ बजे पार्टी केन्द्रीय कार्यालय सानेपामा हुनेछ ।

पत्रकार सम्मेलनमा पार्टीका प्रवक्ता प्रकाशशरण महतसहितका नेताहरुको उपस्थिति रहने बताइएको छ । पत्रकार सम्मेलनमा कांग्रेसले आगामी कार्यक्रम र योजनाका बारेमा पनि जानकारी गराउने भएको छ ।