बीरगञ्ज महानगरको मेयरमा राजेशमान र उपमेयरमा इम्तियाजको जीत निश्चित

९ जेठ, बीरगञ्ज । गणना हुन बाँकी मतभन्दा बढी मतान्तरले अगाडी रहेपछि बीरगञ्ज महानगरपालिकाको मेयरमा जनता समाजवादी पार्टी ‘जसपा’का राजेशमान सिंह र उपमेयरमा नेपाली कांग्रेसका इम्तियाज आलमको जीत सुनिश्चित भएको छ ।

गणना हुन बाँकी सबै मत निकटतम प्रतिष्पर्धीले प्राप्त गरेपनि सिंह र आलमले प्राप्त गरेको मतभन्दा कम हुने भएकाले दुबैको जीत सुनिश्चित भएको हो । बीरगञ्जमा १ लाख २४ हजार ६ सय ४७ मतदाता रहेकोमा ९४ हजार ३ सय २४ मत खसेको थियो । ८० हजार ७६८ मतगणना भइसकेको भने अब १३ हजार ५५६ मतगणना हुन बाँकी छ ।

जसपाका मेयर उम्मेदवार राजेशमान सिंह नेकपा एमालेका उम्मेदवार विजयकुमार सरावगीभन्दा १९ हजार ४५६ मत अन्तरले अगाडि छन् । गणना हुन बाँकी १३ हजार ५५६ सबै मत सरावगीले पाएपनि सिंहलाई जित्न सक्दैनन् । तर हरेक जसो वडामा सिंहकै अग्रता रहेकाले अझै मतान्तर बढ्न सक्ने देखिन्छ ।

सिंहले ३९ हजार ६६१ र सरावगीले २० हजार २०५ मत ल्याएका छन् । राजेशमान, ०७४ सालमा निवर्तमान नगर प्रमुख एवं हाल एमालेका तर्फबाट मेयर उम्मेदवार सरावगीसँग पराजित भएका थिए ।

तत्कालीन संघीय समाजवादी फोरमबाट मेयरमा उठेका सरावगीले १९ हजार ३९३ मत ल्याएर विजयी हुँदा राजेशमान १२ हजार १६५ मत ल्याएर तेस्रो स्थानमा थिए । यसपटक सत्ता गठबन्धनका तर्फबाट उम्मेदवार बनेका राजेशमानले शुरुदेखि नै अग्रता कायम राखेका छन् । मेयर पदका अर्का प्रत्यासी राप्रपाका गिरीश गिरीले २ हजार ९४६ मत पाएका छन् ।

इम्तियाजको पनि जीत सुनिश्चित

यस्तै उपमेयरमा पनि गठबन्धनका उम्मेदवार नेपाली कांग्रेसका इम्तियाज आलमले शुरुदेखि नै अग्रता लिइरहेका छन् । मतान्तर हेर्दा आलमको प्रतिष्पर्धी निकै पछाडि देखिन्छन् । उनले निकटतम प्रत्यासी एमाले र लोसपा गठबन्धनका उम्मेद्वार लोकतान्त्रिक समाजवादी पार्टीका पुरुषोत्तम लाल झाले भन्दा झण्डै ४ गुणा बढी मत ल्याएका छन् ।

इम्तियाजले २५ हजार ५९ मत पाउँदा झाले हालसम्म ६ हजार ६५० मत मात्रै पाएका छन् । उनीहरुबीच १८ हजार ४०९ को मतान्तर देखिएको छ । उपमेयरमा पनि इम्तियाजको जीत निश्चित भएको छ । हालसम्म मेयर पदमा १७ हजार ७६९ र उपमेयरमा ३७ हजार ३७१ मत बदर भएको छ ।