नबिल बैंककाे साधारणसभाले पारित गर्यो नेपाल बंगलादेश बैंक प्राप्तिको विशेष प्रस्ताव

९ जेठ, काठमाडौं ।  नबिल बैंक र नेपाल बंगलादेश बैंकबीचको मर्जर प्रक्रिया अगाडि बढेको छ । नबिल बैंकको विशेष साधारणसभाले नेपाल बंगलादेश बैंकलाई प्राप्ति गर्नेसम्बन्धी विशेष प्रस्ताव पारित गरेपछि यो प्रक्रिया अगाडि बढेको हो ।

नेपाल बंगलादेश बैंकको सम्पत्ति र दायित्वको मूल्यांकन प्रतिवेदनसहित अन्य सम्बद्ध व्यवस्थाको आधारमा निर्धारण गरिएको शेयर मूल्य अनुपात १००ः४३ लाई पनि उक्त विशेष साधारणसभाले स्वीकृति दिएको छ ।

प्रस्ताव अनुसार अब नेपाल बंगलादेश बैंकका शेयरधनीहरूले बैंकको १०० कित्ता बराबर नबिल बैंकको ४३ कित्ता शेयर प्राप्त गर्नेछन् ।

२०७८ चैत्र मसान्तको वित्तीय विवरणअनुसार बंगलादेश बैंकलाई प्राप्ति गरेपश्चात् नबिलको चुक्ता पुँजी २२ अर्ब ८३ करोड २९ लाख रुपैयाँ पुग्नेछ भने कर्जा ३ खर्ब ९ अर्ब र निक्षेप रकम ३ खर्ब २० अर्ब पुग्ने भएको छ ।

त्यसैगरी बैंकको गैरकोषमा आधारित व्यवसायको आकार १ खर्ब ४५ अर्ब रहने र प्राप्तिपश्चात् नबिल बैंकको शाखा सञ्जाल २ सय ५४ पुग्नेछ । सर्वोच्चमा रिट परेका कारण मर्जर प्रक्रिया केही समयका लागि रोकिएको थियो ।