एमालेका हिरालाई हराउँदै जनकपुरको मेयरमा स्वतन्त्र उमेदवार मनोजकुमार विजयी

९ जेठ,  जनकपुरधाम ।  नेपाली कांग्रेस परित्याग गरी स्वतन्त्र उम्मेदवारी दिएका मनोजकुमार साह जनकपुरधाम उपमहानगरपालिकाको प्रमुखमा निर्वाचित भएका छन । उनले कांग्रेसबाट टिकट नपाउने भएपछि राजीनामा दिएर स्वतन्त्रबाट उम्मेदवारी दिएका थिए ।

स्वतन्त्र उमेदवार मनोजले १३ हजार ४६५ मत ल्याउँदै जनकपुरधाम उपमहागरपालिकाको प्रमुखमा निर्वाचित हुँदा उनका निकटतम् प्रतिद्वन्द्वी नेकपा एमालेका शिवशंकर साह हिराले ९ हजार ५३२ मत ल्याएका छन् ।

गठबन्धनबाट नगरप्रमुख पदमा उमेदवारी दिएका जनता समाजवादी पार्टी (जसपा)का लालकिशोर साह चौथो स्थानमा पुगेका छन् । उनले ५ हजार १२४ मत मात्रै ल्याएका छन् । तेस्रो स्थानमा रहेका लोकतान्त्रिक समाजवादी पार्टी (लोसपा)का उमेदवार मनोज चौधरीले ५ हजार ३६० मत ल्याए ।

त्यस्तै, उपप्रमुखमा गठबन्धनबाट उमेदवारी दिएका नेपाली कांग्रेसका किशोरी साह निर्वाचित भएका छन् । किशोरीले १५ हजार ५२५ मत ल्याउँदै उपप्रमुखमा निर्वाचित भएका हुन् । उनको निकटतम् प्रतिद्वन्द्वी नेकपा एमालेकी रुणा झाले १० हजार ८१७ मत ल्याइन् ।