नयाँ जनप्रतिनिधिलाई समयसीमाभित्र काम सक्नै मुस्किल !

१० जेठ, काठमाडौं । स्थानीय तह निर्वाचनका क्रममा निर्वाचत जनप्रतिनिधिलाई निर्देशिका अनुसार काम सक्न मुस्किल हुने देखिएको छ । दोहोरिएकालाई केही सहज भएपनि नयाँलाई भने समस्या देखिएको छ ।

निर्वाचित प्रतिनिधिले अन्तिम परिणाम सार्वजनिक भएको १५ दिनभित्र गाउँ कार्यपालिका र नगर कार्यपालिका गठनका लागि निर्वाचन गर्नुपर्ने हुन्छ । गाउँ कार्यपालिका तथा नगर कार्यपालिका निर्वाचन निर्देशिका २०७४ अनुसार महिला, दलित र अल्पसंख्यक सदस्यका लागि निर्वाचन गर्नुपर्ने हुन्छ ।

निर्वाचनमा मतदाता ३० वैशाखमा भएको स्थानीय तह निर्वाचनबाट निर्वाचित जनप्रतिनिधि नै हुनेछन् । दलित वा अल्पसंख्यक समुदायबाट हुने सदस्य पदका लागि उम्मेदवारी दिने व्यक्तिले सम्बन्धित गाउँपालिका, नगरपालिका वा अधिकारप्राप्त निकायले दिएको दलित वा अल्पसंख्यक समुदायको व्यक्ति भएको प्रमाणित हुने निस्सा पेश गर्नु पर्ने निर्देशिकामा उल्लेख छ ।

निर्वाचनबाट गाउँ कार्यपालिकाको हकमा चार जना महिला सदस्य र दलित वा अल्पसंख्यक पदमा दुई जना सदस्य निर्वाचित गर्नुपर्ने प्रावधान छ । नगर कार्यपालिकामा भने पाँच जना महिला सदस्य र दलित वा अल्पसङ्ख्यक पदमा तीन जना सदस्य निर्वाचित गर्नुपर्ने भनिएको छ ।

सबैभन्दा ठूलो समस्या बजेट तयारीमा छ । उनीहरुले पालिकोको अवस्थाकाबारे जानकारी नहँदा तोकिएको मितिभित्र बजेट बनाउन कठिन हुनेछ । स्थानीय तहमा भएका कर्मचारीले नै अहिले बजेट बनाइरहेका छन् ।