इन्धन आयात निजी क्षेत्रलाई दिन पौडेलको नेतृत्वमा सरकारले बनायो अध्ययन कार्यदल

१० जेठ, काठमाडौं । चौतर्फि विरोध भइरहेका बेला अन्ततः सरकारले इन्धन आयातको जिम्मा निजि क्षेत्रलाई दिने प्रक्रियाका लागि अध्यायन कार्यदल गठन गरेको छ । उद्योग, वाणिज्य तथा आपूर्ति मन्त्रालयको प्रस्तावमा मन्त्रीपरिषदले कार्यदल बनाउने निर्णय गरेको हो ।

पेट्रोलियम पदार्थको आयातमा निजी क्षेत्रलाई प्रवेश गराउने विषयमा अध्ययन गर्न कार्यदल बनाएको एक मन्त्रीले जानकारी दिए । मन्त्रालयले प्रस्ताव गरेपछि मंगलबार विहान बसेको मन्त्रिपरिषद्को बैठकले राष्ट्रिय योजना आयोगका उपाध्यक्ष डा. विश्वनाथ पौडेलको नेतृत्वमा अध्ययन कार्यदल बनाउने निर्णय गरेको हो ।

समितिले पेट्रोलियम पदार्थको आयातमा निजी क्षेत्रको प्रवेश गराउने विषयमा अध्ययन गरी सुझाव पेस गर्नेछ । अहिले देखिएको पेट्रोलियम समस्या समाधानका विषयमा पनि अध्ययन गर्ने बताइएको कार्यदलमा नेपाल आयल निगमका कार्यकारी निर्देशक पनि सदस्य रहेका छन् ।