एमाले सांसदलाई सरकारको नीति तथा कार्यक्रमविरुद्ध पेस हुन ओलीको निर्देशन

११ जेठ, काठमाडौं । नेकपा एमालेका अध्यक्ष केपी ओलीले आफ्नो पार्टीका सांसदहरूलाई सरकारको नीति तथा कार्यक्रमविरुद्ध सशक्त रूपमा पेस हुन निर्देशन दिएका छन् । बुधबार बसेको एमाले संसदीय दलको बैठकमा ओलीले उक्त निर्देशन दिएका हुन् ।

‘बैठकमा अध्यक्षज्यूले सरकारको प्रस्तुत नीति तथा कार्यक्रम बुँदा बुँदाको चर्चा र विश्लेषण गर्नुभयो,’ एमाले नेता भीम रावलले भने, ‘उहाँले संसदमा सशक्त रूपमा पेस हुन आग्रह गर्नुभएको छ ।’

बैठकमा ओलीले सरकारले नीति तथा कार्यक्रममा नेपालको स्वतन्त्र परराष्ट्र नीति विपरीत कार्यक्रम राखेको उल्लेख गरेका थिए ।

संविधानको विपरीत, राष्ट्रहित विपरीतका कुरालाई सशक्त रूपमा उठाउन उनले सबैलाई आग्रह गरेका थिए ।बैठकमा निर्वाचनको विषयमा गम्भीर छलफल नभएको नेता रावलले बताए ।