बीरगञ्जमा जसपा र साहिब दरबारको आयोजनामा रक्तदान

१२ जेठ, बीरगञ्ज । साहिब दरबार सेवा संस्थान र जनता समाजवादी पार्टी बीरगञ्ज महानगर कमिटीको संयुक्त आयोजनामा बीरगञ्जमा जारी रक्तदान कार्यक्रममा अहिलेसम्म ६६ पोका रक्त संकलन भएको छ ।

अंशु श्रेष्ठ, अफरोज आलम, इश्वरचन्द्र यादव, मनोज पटेल, अस्मिता पराजुली लगायत ६६ जनाले रक्तदान गरिसकेको संस्थानका महासचिव उमेशलाल सहनीले जानकारी दिए ।

कार्यक्रममा संघीय सांसद प्रदीप यादवले वीरगञ्जमा देखिएको रगत अभाव पूर्ति गर्न संस्थानसँगको सहकार्यमा पार्टीले रक्तदान कार्यक्रम आयोजना गरेको बताए । अस्पतालमा उपचाररत बिरामीलाई रगतको निकै खाँचो हुने भएकाले रक्त संकलन गर्ने अभियानमा सबै सहभागि हुनुपर्नेमा उनले जोड दिए ।

कार्यक्रमको उद्घाटना गर्दै बीरगञ्ज महानगरपालिकाका नवनिर्वाचित मेयर राजेशमान सिंहले सामाजिक उत्तरदायित्व वहन गर्ने सबैको जिम्मेवारी भएकाले आफूहरुले निर्वाचित भएपछि पहिलो कार्यक्रम रक्तदानबाट सुरु गरेको प्रतिकृया दिए ।

बीरगञ्जमा देखिएको रगत अभाव पूर्ती गर्न रक्तदान कार्यक्रमलाई निरन्तरता दिने पनि बताए । बीरगञ्जको राणिसती अतिथि सदनमा जारी रक्त दान कार्यक्रम १२ बजेसम्म चल्ने संस्थानका महासचिव सहनीले जानकारी दिए ।

बढ्दो गर्मी र स्थानीय निर्वाचनका कारण केही समय यता बीरगञ्जमा रक्तदान कार्यक्रममा कमी आउँदा यहाँ रगतको अभाव देखिएको रक्तसञ्चार केन्द्र बीरगञ्जले जनाएको छ ।

रगत अभाव हुदा यहाँका विभिन्न अस्पतालमा भर्ना भएका बिरामीहरुको उपचारमा समस्या आउन थालेपछि जसपा र साहिब दरबार संस्थाले रगतको अभावलाई पूर्ति गर्न कार्यक्रम आयोजना गरेको हो ।