बीरगञ्जमा वर्षौदेखिको जीर्ण सडक मेयरको आदेशमा धमाधम मर्मत हुँदै

१३ जेठ, बीरगञ्ज । बीरगञ्जका नव निर्वाचित मेयर राजेशमान सिंह शपथ ग्रहण गरेको दिनबाटै एक्सनमा उत्रिएका छन् । भोट माग्दा स्थानीयसँग गरेको बाचा बमोजिम उनले बीरगञ्जको घण्टाघरदेखि माइस्थानसम्मको सडक मर्मत गर्ने काम सुरु गरेर एक्सनमा उत्रिएका हुन् ।

पदभार ग्रहण गर्दै उनले पहिलो निर्णयबाटै वर्षौँदेखि जीर्ण रहेको यो सडक मर्मतको काम सुरु गराएका हुन् । मर्मत गर्ने निर्णय गरेसँगै बिहीबार रातिबाटै मर्मतको काम धमाधम भइरहेको छ ।

७ दिनभित्र काम सकिने गरी मर्मतको काम अघि बढेको महानगरले जनाएको छ । यसपछि बीरगञ्जको पावरहाउस क्षेत्रमा जीर्ण बनेको मुख्य सडक निर्माणको काम हुने छ ।

वर्षौँदेखि मर्मत सम्भार नहुँदा सास्ती खेपीरहेका नगरबासीलाई परिवर्तनको प्रत्याभुती दिलाउन मुख्य सडक मर्मतको काम अगाडी बढाएका हुन् ।

यसअघिका मेयर विजयकुमार सरावगीले सडक आफ क्षेत्राधिकार भित्र नपर्ने भन्दै मर्मत नगरिदिँदा नगरवासीले हैरानी खेप्न परेको थियो ।

शपथ लिएकै दिन नवनिर्वाचित मेयर सिंहले बाटो मर्मतको काम अघि बढाएर नगरवासीको विश्वास र भरोसालाई कायम राखेको स्थानीय बताउँछन् । सडक मर्मत सँगसँगै महानगरवासीले अब विद्युत महशुल छुट पाउनुका साथै सिँचाई मिटर निशुल्क प्रयोग गर्न पाउने भएका छन् ।

महानगरभित्र बसोबास गर्ने १० हजार ९ सय २४ घरधुरीको घरेलु मिटर ९ग्राहस्थ मिटर० मा हुने मासिक ३० युनिटसम्म विद्युत खपत गर्ने प्रयोगकर्ताको न्युनतम शुल्क र इनर्जी शुल्क महानगरले नै भुक्तानी गर्ने निर्णय गरेका छन् । यसले महानगरका विपन्न तथा कृषकहरु लाभान्वित हुने विश्वास लिइएको छ ।