वालिङमा दिगो बिकासको स्थानीयकरण अन्तर्गत हरित पुनःउत्थान परियोजना शुरु

१३ जेठ, वालिङ । वालिङमा दिगो बिकासको स्थानीयकरण अन्तरगत हरित पुनःउत्थान तथा कोभिड–१९ प्रतिकार्य पहल परियोजना शुरु भएको छ ।  वालिङ नगरपालिका र संयुक्त राष्ट्र संघीय विकास कार्यक्रम (युएनडिपी) को आर्थिक साझेदारी तथा दियालो संस्थाको व्यवस्थापनमा परियोजना शुरु भएको हो ।

कार्यक्रममा नवनिर्वाचित जनप्रतिनिधी तथा सरोकारवालाहरुलाई परियोजनाको सञ्चालन र गरिने क्रियाकलापका सम्वन्धमा जानकारी गराईएको छ । कार्यक्रममा बोल्दै वालिङ नगरपालिकाका निवर्तमान् नगरप्रमुख दिलिपप्रताप खाँणले शिक्षा र आर्थिक बिकास बिना गरिवि हट्न नसक्ने बताए ।

नगरपालिकाले बिगतका बर्षहरुमा उत्पादनमा जोड दिदै आएको भन्दै यसलाई निरन्तरता दिन नवनिर्वाचित जनप्रतिनिधिहरुलाई आग्रह समेत गरे । आर्थिक विकास सबै भन्दा ठुलो बिषय हो खाँणले भने, जसका लागि सबैलाई उत्पादनमा जोड्न जरुरी छ । प्रभावकारी रुपमा यसअघिका परियोजनाा सञ्चालन भईरहेको खाँणको भनाई छ ।

दिगो बिकासको स्थानीयकरण कार्यक्रम मार्फत कोभिड प्रभावित तथा अन्य कारणले समस्यामा परेका वालिङका कृषक तथा उद्यमीहरुलाई फाईदा पुग्ने निर्वातमान् प्रमुख खाँणले बिश्वास व्यक्त गरे।

कार्यक्रममा बोल्दै वालिङ नगरपालिकाका प्रमुख कृष्ण खाँणले नागरिकको जीवनस्तरमा परिवर्तन ल्याउन र गरिवि घटाउन सञ्चालन भईरहेका योजनालाई प्रभावकारी रुपमा सञ्चालन गरिने जानकारी दिए । उनले भने, “कृषक उद्यमी तथा नागरिकको फाईदाका लागि हामी यस्ता परियोजनालाई निरन्तर रुपमा लक्ष्य सम्म पुर्याउने छौं ।”

नागरिकले प्रगती र बिकासलाई तथ्याङकको तस्विरमा हेर्न चाहेको भन्दै परियोजनालाई सोही अनुरुप सञ्चालन गरिनुपर्ने धारणा समेत राखे । जनप्रनिधिहरु नागरिकका साझा व्यक्ति भएको भन्दै खाँणले नगरको बिकासमा सबै मिलेर काम गर्ने प्रतिवद्धता समेत व्यक्त गरे ।

उनले कार्यक्रम सफल पार्ने सहयोग गर्ने बिकास र संमृद्धि आफूहरुको प्राथमिकतामा रहेको स्पष्ट पारे । कार्यक्रममा बोल्दै नगरउपप्रमुख कविता तिवारी गैह्रेले वालिङका नागरिकको भावना अनुरुप आर्थिक संमृद्धिको लागि परियोजना प्रभावकारी हुने बिश्वास व्यक्त गरे । वालिङमा उद्यमीको शहर बनाउने गरी भईरहेका कामलाई आफूहरुले पनि निरन्तरता दिने तिवारीको भनाई छ ।

कार्यक्रममा बोल्दै वालिङ नगरपालिकाका प्रमुख प्रशासकीय अधिकृत राजन भट्टराईले दिगो बिकासको लक्ष्य प्राप्तीका लागि युएनडिपीसँगको सहकार्य प्रभावकारी भईरहेको बताए । कार्यक्रममा युएनडिपी नेपालका गण्डकी तथा लुम्बिनी प्रदेश प्रमुख सुदिप अर्यालले स्थानीय उत्पादनलाई प्रवद्र्धन गरी बजारीकरण गर्ने योजना अनुरुप शुरु भएको परियोजना सफल हुने बिश्वास व्यक्त गरे । बाली देखि थाली सम्म भन्ने उक्तीलाई स्मरण गर्दै अर्यालले स्थानीय उत्पादनको बृद्धिले मात्रै आर्थिक संमृद्धि सम्भव भएको बताए ।

वालिङले गरिरहेको उद्यमीको शहर बनाउने अभियानलाई युएनडिपीले साथ दिएको अर्यालको भनाई छ । वालिङमा सञ्चालन भईरहेको उद्यमशीलता,व्यवशाय प्रवर्धन तथा नवप्रवर्तन केन्द्र ईबिक मार्फ उद्यमी अनुकुल बातावरण बनाउने कार्य अरु पालिकाको लागि पनि उदाहरणीय छ अर्यालले भने ।

उनले आर्थिक, सामाजिक र वातावरणीय गरी दिगो बिकासका तीन वटा आयामलाई प्रभावकारी कार्यान्वयन गरेमा दिगो बिकासका लक्ष्य प्राप्त हुन सक्ने भनाई राखे । कार्यक्रममा दियालो संस्थाका उपाध्यक्ष बिष्णु सुवेदी, पत्रकार महासंघ स्याङ्जाका अध्यक्ष श्रीकृष्ण सिग्देल लगायतले बालेका थिए । कार्यक्रम नगरप्रमुख कृष्ण खाँणको सभापतित्व र परियोजना प्रमुख राधाकृष्ण डुम्रेको सञ्चालनमा सम्पन्न भएको थियो ।