सीडीओ र प्रहरी प्रमुखलाई गृहमन्त्रीको निर्देशन,‘सम्पर्कविहीन विमान चाँडो खोज्नू’

१५ जेठ काठमाडौं । गृहमन्त्री बालकृष्ण खाँणले सम्पर्कविहीन भएको तारा एयरको विमानको खोजिका लागि सबै उपाय अपनाउन र स्रोतहरुको परिचालन गर्न जिल्लाका प्रमुख जिल्ला अधिकारी र प्रहरी प्रमुखहरुलाई निर्देशन दिएका छन् ।

गृहमन्त्री खाँणले कास्कीको पोखराबाट जोमसोमका लागि उडेको तारा एयरको विमान खोजी कार्यलाई तीव्र बनाउन सुरक्षा निकाय र सम्बन्धित जिल्ला प्रशासन प्रमुखहरुलाई टेलिफोनमार्फत निर्देशन दिएका हुन् ।

खाँणले कास्कीका प्रमुख जिल्ला अधिकारी जयनारायण आचार्य, गण्डकी प्रदेशका प्रहरी प्रमुख दिवेश लोहनी र मुस्ताङका प्रमुख जिल्ला अधिकारी नेत्रप्रकाश शर्मालाई टेलिफोन गरी यथाशक्य खोजी कार्यलाई तिव्रता दिन निर्देशन दिएको मन्त्री खाँणको निजि सचिवालयले जनाएको छ ।