निजगढ विमानस्थलबारे सर्वोच्चको फैसला षडयन्त्रमूलक छ,भारत परस्त भयोः अध्यक्ष नेपाल

१६ जेठ, काठमाडौं । नेकपा एकीकृत समाजवादीका अध्यक्ष माधवकुमार नेपालले बाराको निजगढ अन्तर्राष्ट्रिय विमानस्थलबारे सर्वोच्च अदालतले दिएको फैसला षडयन्त्रमूलक र भारत परस्त भएको बताएका छन् । उनले सर्वोच्चको निर्णय विकास विरोधी भएको बताएका छन् ।

प्रतिनिधिसभाको अन्तर्राष्ट्रिय सम्बन्ध समितिको सोमबार बसेको बैठकमा पूर्वप्रधानमन्त्रीसमेत रहेका अध्यक्ष नेपालले सर्वोच्च अदालतले निजगढ अन्तर्राष्ट्रिय विमानस्थलको विकल्प खोज्नुपर्ने भनि दिएको फैसला नेपालको विकासका लागि दुर्भाग्यपूर्ण भएको बताए ।

छलफलमा सहभागी नेता नेपालले सर्वोच्चबाट आएको फैसलाबाट आफु स्तब्ध भएको बताउँदै सर्वोच्च विकासको सहयोगी हुनुपर्ने र राज्यका कुनै पनि निकाय विकासका बाधक बन्न नमिल्ने बताए । उनले सर्वोच्चले वस्तुस्थितिबारे जानकारी नभइकन निर्णय गरेकोमा आपत्ति जनाए ।

नेपालले बाराको निजगढमा अन्तर्राष्ट्रिय विमानस्थल निर्माण हुन नदिनका लागि षडयन्त्र भएको बताउँदै अन्तर्राष्ट्रिय विमानस्थल निर्माण नहुने तर पारिपट्टी भारतमा भने ठूल्ठूला अन्तर्राष्ट्रिय विमानस्थल निर्माण भइरहेको र हुने क्रममा रहेको बताए ।

उनले भने, ’निजगढ विमानस्थल निर्माण नबनोस् भनेर ठूलो षडयन्त्र छ । भारतको दरभंगा र कुसीनगरमा ठूल्ठूला विमानस्थल निर्माण भएका छन् । वीरगञ्जसँग जोडिएको रक्सौलमा अन्तर्राष्ट्रिय विमानस्थल निर्माण भइरहेको छ ।’

निजगढ विमानस्थल निर्माणका लागि भारतले खेलेको भूमिकाप्रति उनले असन्तुष्टि जनाए । ’भारत सरकार नेपालको विकासका लागि सहयोगी हुने कि नहुने ? किन अवरोध खडा हुने गरेको छ ? भारतको ध्यानाकर्षण गर्नपर्ने भएको छ,’ उनले भने । निजगढमा विमानस्थल निर्माण रोक्न कहिले धार्मिक व्यक्तिहरूलाई अगाडि सारिएको र कहिले वातावरणको विषय अगाडि सारिएको भन्दै उनले असन्तुष्टि व्यक्त गरे ।

निजगढमा अन्तर्राष्ट्रिय विमानस्थल निर्माण गर्ने भनिएको ठाउँबाट सार्न नमिल्ने नेपालको भनाइ थियो । उनले त्यहाँभन्दा दक्षिणमा बाक्लो वबस्ती भएकाले सम्भव नभएको बताए । अध्ययन भएर नै, १० वटा ठाउँको अध्ययन गरपछि वैकल्पिक एयरपोर्ट निजगढमा निर्माण गर्नुपर्ने निष्कर्षमा पुगिएको उनले बताए । नेपालले सर्वोच्च अदालतले विगतमा पनि विकास निर्माणका काममा पटकपटक भाँजो हाल्ने गरेको भन्दै गुनासो गरे ।