करको दर घटाउन नवनिर्वाचित मेयरसँग बीरगञ्जका व्यवसायीको माग

१६ जेठ, बीरगञ्ज । वीरगन्जका उद्योगी व्यवसायीहरुले करको दर घटाउन नवनिर्वाचित मेयर राजेशमान सिंहसँग माग गरेका छन् । नवनिर्वाचित मेयर सिंहलाइ उनकै कार्यकक्षमा भेटेर उद्योगीहरुले यस क्षेत्रका उद्योग व्यपारका समस्या र चुनौती बारेमा ध्यानाकषर्ण गराउँदै करको दर घटाउन माग गरेका हुन् ।

भेटका क्रममा संघका अध्यक्ष डाक्टर सुबोध कुमार गुप्ताले नवनिर्वाचित मेयर सिंहलाई बधाई तथा सफल कार्यकालको शुभकामना दिदै अगामी दिनमा वीरगन्ज उद्योग वाणिज्य संघ र महानगरपालिकाले गर्न सक्ने सहकार्यका बारेमा पनि सिंहको ध्यानाकर्षण गराएका थिए ।

महानगरले संकलन गर्दै आएको कर परिमार्जन गर्न, बीरगन्जमा एउटा ट्रान्सपोर्ट नगरको निर्माण गर्न पनि संघका अध्यक्ष गुप्ताले आग्रह गरे । उनले बीरगन्ज क्षेत्रमा सन्चालित उद्योगहरुका लागि आवश्यक ट्रेडफेयर मैदान निमार्णमा संघ र महानगर बिच सहकार्य गर्न सकिने तर्फ पनि मेयर सिंहलाइ जानकारी गराए ।

नवनिर्वाचित मेयर सिंहले यस अघि बीरगन्ज महानगर, महानगरवासी र उद्योगी व्यवसायीबीच रहेको मत भिन्नतालाई अब आफुले हटाउने प्रतिबद्धता जनाए । उनले महानगरले संकलन गर्दै आएका कर पारदर्शी बनाउने, करका दर पुनरावलोकन गर्ने र करको दर भन्दा पनि करको दायरा बढाउनेतर्फ महानगर अघि बढ्ने बताए ।