कार्यभार सम्हाल्दै मेयर साहले भने, ‘फोहोर व्यवस्थापन नभएसम्म खादा नल्याउँनू’

१६ जेठ, काठमाडौं । काठमाडौं महानगरपालिकाका मेयर वालेन्द्र (बालेन) साहले पदभार ग्रहण गरेका छन् । उनले नगर कार्यपालिकाको बैठक लाइभ गर्ने र फोहोर व्यवस्थापन नभएसम्म सम्मान नलिने निर्णयका साथ पदभार ग्रहण गरेका हुन् ।

पदभार ग्रहणपछि उनले आफूले महानगपालिकाको फोहोर व्यवस्थापनको कामलाई पहिलो प्राथमिकतामा राखेको बताए । निर्वाचनपछि कार्यपालिकाको प्रथम बैठक सोमबार दिउँसो ४ बजेका लागि बोलाइएको छ । उक्त बैठक लाइभ हुने उनले जानकारी दिए ।

उनले फोहोरको व्यवस्थापन नभएसम्म खादा, माला, अन्तर्वार्ता र सेलिब्रेसनहरू नगर्ने भन्दै हामीले गरेको पापको भारी सिसडोलबासीले भोग्दै आएको बताए । साहले भने, ’फोहोरको व्यवस्थापन नहुन्जेल र सिसडोलबासीले स्वच्छ वातारण र हावामा बस्ने र पानी पिउने वातावरण नहुन्जेल अरु काम हुँदैन ।’