आजदेखि प्रतिनिधि र राष्ट्रिय सभामा बजेटमाथि सैद्धान्तिक छलफल, एमाले फरक रुपमा प्रस्तुत हुने

१७ जेठ, काठमाडौं । आजबाट संघीय संसदका दुबै सदनमा सरकारले ल्याएको आगामी आर्थिक वर्षको वार्षिक बजेटमाथि सैद्धान्तिक छलफल सुरु हुँदै छ । बिहान ११ बजे बस्ने बैठकमा बजेटमाथि सैद्धान्तिक छलफल सुरु हुने भएको हो ।

अर्थमन्त्री जनार्दन शर्माले जेठ १५ गते संघीय संसदमा बजेट प्रस्तुत गरेका थिए । उक्त बजेटमा छलफल गर्न लागिएको हो ।

बजेटमाथि छलफलका क्रममा उठेका प्रश्नको अर्थमन्त्री शर्माले जवाफ दिनेछन् । छलफलका लागि सभामुख अग्नि सापकोटाले १९ गतेसम्म तिन दिन समय तोकेका छन् ।

यता, बजेटको सैद्धान्तिक छलफलमा सहभागि हुने प्रमुख प्रतिपक्ष दल नेकपा एमालेले भने आफ्नो शैलीलाई फरक बनाउने भएको छ । एमालेले सरकारले अनुचित ढंगले आगामी आर्थिक वर्षको बजेट ल्याएको भन्दै भण्डाफोर गरेर लैजाने रणनीति लिएको छ ।

एमाले संसदीय दलको बैठकले बजेट अनुचित, विना सिद्धान्त र प्राथमिकताको आधारमा आएको भन्दै त्यसको भण्डाफोर हुने गरी जनताको बीचमा लैजान निर्णय गरिसकेको छ ।