तारा एयरको विमान दुर्घटनाका बाँकी शव काठमाडौं ल्याइँदै

१७  जेठ, काठमाडौं । मुस्ताङको थासाङ गाउँपालिका–२ कोवाङको सिरानमा पर्ने सानोसरे भीरमा तारा एयरको विमान दुर्घटनामा सबै मृतकहरुको शव संकलन भएको छ । संकलन भएका शवलाई काठमाडौं पठाउने तयारी गरिएको छ ।

द्युर्घटनामा परी मृत्यु भएका चालक दलका ३ जनासहित २२ यात्रुमध्ये १० वटा शव सोमबारै उद्धार गरी काठमाडौं ल्याइएको छ । मुस्ताङका प्रमुख जिल्ला अधिकारी नेत्रप्रसाद शर्माका अनुसार बाँकी १२ वटा शव दुर्घटनास्थलबाट तल कोवाङ बस्तीमा झारिएको र मुचुल्का उठाएर सबै शव काठमाडौं पठाउने तयारी भइरुहेको छ ।

विमान दुर्घटनामा ज्यान गुमाएका सबै यात्रुको शव संकलन भएको छ । १० वटा शव हिजै काठमाडौं पठाइयो । बाँकी १२ शव घटनास्थलबाट तल कोवाङ बस्तीमा झार्ने काम भरहेको छ । केहीबेरमा बाँकी शवहरु काठमाडौं पठाउछौं,’ प्रजिअ अधिकारीले बताए ।

यसैबीच विमानको ककपिट भ्वाइस रेकर्डर (ब्ल्याक बक्स) समेत फेला पारी काठमाडौं पठाउन लागेको उनले जानकारी दिए । यसबाट पनि विमान दुर्घटनाको कारण खुल्ने बताइएको छ ।