म्यादी सरकारले बजेट हैन, गठबन्धनको चुनावी घोषणापत्र ल्यायोः पौडेल

१७ जेठ, काठमाडौं । नेकपा एमालेका उपहासचिव विष्णु पौडेलले पाँच दलीय सरकारले आगामी आर्थिक वर्षको बजेट नभएर सत्ता गठबन्धनको चूनावी घोषणपत्र ल्याएको आरोप लगाएका छन् ।

प्रतिनिधिसभाको मंगलबारको बैठकमा आर्थिक वर्ष २०७९÷०८० को राजश्व र व्ययको वार्षिक अनुमानमाथि छलफलमा सहभागी हुँदै उनले जनतालाई झुक्याउने गरी पूरा हुन नसक्ने र चुनावलाई लक्षित गरी बजेट ल्याएको बताए ।

स्रोत साधानको प्रयोगबाट आर्थिक वृद्धि हुने भन्दै उनले पुँजी लगानी नै अपुग रहेको र सरकारले ल्याएको आगामी आर्थिक वर्षको बजेटले देशमा रहेको आर्थिक संकट अन्त्य गर्नभन्दा पनि थप जटिलता थप्नेखालको रहेको उनको टिप्पणी छ ।

पौडेलले सरकारले ल्याएको बजेट बजेटजस्तो नभएर सत्ता गठबन्धनको चुनावी घोषणापत्रजस्तो भएको दोरोर्याउँदै म्यादी’ भूमिकामा रहेको सरकारलाई यसरी बजेट ल्यषउने अधिकार नभएको बताए ।

पौडेलले भने,‘यो सरकार आगामी चुनावसम्मको म्यादी सरकार हो । तर, उसले बजेट बनाउँदा आफ्नो म्यादी भूमिका बिर्सिएको छ । चुनावी सरकारले निर्वाचनबाट आउने नयाँ सरकारलाई गह्रौँ भारी बोकाउन पाउँदैन ।’

बजेटले आर्थिक वृद्धिदरको लक्ष्य ८ प्रतिशत पुग्ने लक्ष्य निर्धारण गरेको भन्दै त्यो देशको आर्थिक अवस्था र सरकारको तयारीका कारण सम्भव नभएको बताए । उनले करिब ५ प्रतिशतभन्दा माथि आर्थिक वृद्धिदर पुग्न नसक्ने दाबी गर्दै सरकारले हचुवा आकलन गरेको तर्क गरे ।

मुद्रास्फीति ७ प्रतिशतमा सीमित राख्ने लक्ष्य बजेटले लिएको भन्दै अहिले नै त्यो नाघिसकेको र आउँदा दिनमा अझ बढेर जाने जिकिर गरे । उत्पादन लागत बढिरहेको अवस्थामा ७ प्रतिशतमा मुद्रास्फीति कायम राख्न सम्भव नभएको उनको तर्क थियो ।