भारतीय गायक केकेको निधन

१८ जेठ एजेन्सी । भारतीय गायन क्षेत्रमा केके नामले चर्चित गायक कृष्णकुमार कुन्नथको निधन भएको छ ।

मंगलवार ५३ वर्षको उमेरमा उनको निधन भएको भारतीय सञ्चार माध्यमले जनाएको छ । कलकत्तामा दुइ दिने कन्सर्टका लागि पुगेका उनी मंगलवार राति १० बजे अस्पताल पुगेका थिए । त्यहाँको सिएमआरआइ अस्पतालमा पुग्दा उनको निधन भइसकेको घोषणा भयो । कन्सर्टमै अस्वस्थ भएपछि कन्सर्टको मध्यान्तरमा उनले यो कुरा आयोजकलाई जानकारी गराएको स्रोतलाई उद्धृत गर्दै इन्डियन एक्स्प्रेसले भनेको छ। तर अन्त्यसम्मै उनले प्रस्तुति दिए ।

त्यसपछि उनलाई इस्प्लान्ड नामक पाँचतारे होटलमा लगियो। त्यहाँ पुग्दा उनको स्वास्थ्य निकै बिग्रिसकेको थियो । र अस्पताल नपुग्दै उनको निधन भयो । स्थानीय गुरुदास कलेजले कन्सर्ट आयोजना गरेको थियो । उनले २५० गीतमा स्वर दिएका छन् । उनकी श्रीमती र दुई छोरा बुधवार कलकत्ता पुग्ने बताइएको छ। उनको निधनमा भारतीय प्रधानमन्त्री नरेन्द्र मोदीले दुस्ख व्यक्त गरेका छन् ।

त्यसैगरी अभिनेता अक्षय कुमार, गायक हर्षदीप कौर, अभिनेत्री स्वस्तिका मुखर्जीलगायतले सामाजिक सञ्जालमार्फत दुस्ख व्यक्त गरेका छन् ।