ओली नेतृत्वको सरकारले छोडेका सबै समस्या यो बजेटले मात्रै समाधान हुँदैनन्ः सांसद बस्नेत

१८ जेठ, काठमाडौं । नेकपा माओवादी केन्द्रका सांसद शक्ति बस्नेतले अहिलेको बजेटले एमाले अध्यक्ष केपी शर्मा ओली नेतृत्वको सरकारले छाडेर गएका सबै समस्याको समाधान गर्न नसक्ने बताएका छन् ।

उनले आर्थिक क्षेत्र सारा समस्या खडा गरेर त्यसै छोडेर गएका विषयलाई यही सरकारले यही बजेटबाट पुरा गर्नुप्र्ने एमाले चाहना पनि पुरा नहुने बताए ।

प्रतिनिधिसभाको बुधबारको बैठकमा बस्नेतले अघिल्लो सरकारले तीन वर्षभन्दा बढी अवधिमा अर्थतन्त्रमा समस्या निम्त्याएको बताए । उसले छाडेर गएका सबै समस्या समाधान गर्न सहज नभएको उनको भनाई छ ।

बस्नेतले भने, ‘हाम्रो आर्थिक नीतिले जनतालाई सामाजिक सुरक्षाका हकदार बनाउने मात्रै होइन उनीहरूलाई आर्थिक विकासको प्रक्रिया र संरचनामा सहभागी गराउँदै प्रतिफलको हिस्सेदार बनाउनेतर्फ ध्यान दिनुपर्छ । यसको लागि सार्वजनिक निजी साझेदारी, सहकार्यतर्फ ध्यान दिन आवश्यक छ ।’

अर्थतन्त्रको अवस्था अहिलेको रूपमा ल्याउन यसअघिको सरकार कति जिम्मेवार र अहिलेको सरकारका कति जिम्मेवार भन्ने बहस गर्न आवश्यक नभएको बस्नेतले बताए । उनले बजेट प्रस्तुत गर्ने अर्थमन्त्रीको नियत के हो भनेर जाने भन्दा परिणाम के हुन्छ भन्नेमा सबै जानुपर्ने बताए ।

आगामी आर्थिक वर्षको बजेटले सबै क्षेत्र, वर्ग र समुदायमा उत्साह थप्ने गरी सन्तुलन कायम गरेको बस्नेतको भनाइ थियो । बजेटले कृषि क्षेत्रको सुधारलाई अर्थतन्त्रको सुधारको आधार बनाउने प्रयास गरेको भन्दै उनले कृषि क्षेत्र सुधारको एकीकृत प्याकेज बजेटमा प्रस्तुत भएको बताए ।