शेयरबजारमा बजेट राजनीतिको प्रभाव, १७ महिना यताकै कम विन्दुमा झर्यो नेप्से परिसूचक

१८ जेठ, काठमाडौं । आगामी आर्थिक वर्षको बजेटमा देखिएको राजनीतिक उताव चढावको प्रभाव शेयरबजारमा पर्दा लगानीकर्ताहरु मारमा परेका छन् । विगत डेढ वर्षदेखि सामायन्य उतवा चढावकाबीच रहेको शेयरबजारको परिसूचक बुधबार अस्वभाविक रुपमा तल झरेको छ ।

बजेट सार्वजनिक भएपछि घट्दो क्रममा रहेको शेयर बजार मापक नेप्से परिसूचक बुधबार एकैचोटी २१ सय ३० अंकमा ओर्लिएको छ । शेयर बजारको कारोवारमा यो अंक १७ महिनायताकै कम हो ।

हिजो मंगलबार ३५ अंक घटेको नेप्से आज बुधबार ७.२१ अंकले घटेको छ । योसँगै मंगलबार १ अर्ब ३१ करोडको कारोबार भएकोमा बुधबार १ अर्ब ७ करोडमा झरेको छ ।

बुधबारको कारोवारमा विकास बैंक २१, जलविद्युत् १६ र फाइनान्स उपसमूह ५ अंक बढे । बैंकिङ ५, होटल तथा पर्यटन ९, जीवन बीमा १५५, उत्पादन ३३, लघुवित्त १३, निर्जीवन बीमा १५७ र ब्यापार उपसमूह ३३ अंकले घटेका छन् ।

धेरैजसो कम्पनीको मूल्य बढे पनि समग्र परिसूचक नेप्से घटेको हो । यसमा उच्च पुँजीकरणका कम्पनीको मूल्य घटेकाले यस्तो प्रभाव देखिएको हो । कुल १०१ कम्पनीको मूल्य बढ्दा ८४ को घट्यो भने १० को स्थिर रह्यो । दुई कम्पनीको मूल्य करिब १० प्रतिशत बढेको छ ।

मैलुङ खोला जलविद्युतको मूल्य १० प्रतिशत बढ्यो । बलेफी हाइड्रोको मूल्य ९.९ प्रतिशत बढ्यो । रकमका आधारमा धेरै कारोबार हुने कम्पनीमा इन्भेष्टमेन्ट बैंक, हिमालयन डिस्टिलरी, शिखर इन्स्योरेन्स, एनआईसी एसिया बैंक, अरुण काबेली रहे । शिखर इन्स्योरेन्सको मूल्य १० प्रतिशत तथा इन्भेष्टमेन्ट बैंकको ७ प्रतिशत घट्यो । यसले लगानी कर्ताहरुलाई थप अन्योल बनाएको छ ।