माओवादीले डाक्यो केन्द्रीय समितिको भर्चुअल बैठक

१९ जेठ, काठमाडौं ।  नेकपा माओवादी केन्द्रले पार्टीको आगामी कार्यनीतिबारे छलफल गर्न केन्द्रीय समितिको बैठक बोलाएको छ । सबै केन्द्रीय सदस्यलाई उपस्थित गराउन असम्भव भएपछि भर्चुअलमार्फत बैठक गर्न लागिएको बताइएको छ ।

शुक्रबार साँझ ६ बजे बस्ने भर्चुअल बैठकले हालै सम्पन्न स्थानीय तहको निर्वाचनबारे समीक्षा गर्ने छ । सत्ता गठबन्धनमा रहेका दलसँग तालमेल गरी स्थानीय निर्वाचन गएको नेकपा माओवादीले गठबन्धको प्रभावकारितालाई विशेष महत्व दिएको छ ।

गठबन्धनमा पाँच दल रहेपनि मुख्य कांग्रेससँग गठबन्धन भएकाले आगामी संघ र प्रदेशको निर्वाचनमा अहिलेकै गठबन्धनमा रहने वा अर्को बाम गठबन्धन बनाउन प्रयास गर्ने भन्ने विषयमा छलफल हुने नेताहरुले बताएका छन् ।

माओवादी अध्यक्ष पुष्पकमल दाहाल‘प्रचण्ड’ले बुधबार एक प्रशिक्षण कार्यक्रममा देशको राजनीतिको साँचो माओवादीको हातमा आएकाले आफुलाई अहिलेको गठबन्धन तोडेर अर्को गठबन्धनमार्फत प्रधामन्त्री बन्न अफर आएको बताएका थिए । उनले यही आधारमा कांग्रेसलाई पनि धम्कीपूर्ण भाषामा सचेत रहन भनेका थिए ।

राजनीतिक बृत र पार्टीभित्रै पनि प्रचण्डको भनाइको आलोचना भइरहेका बेला केन्द्रीय समितिको बैठक बोलाइएको हो । स्थानीय तहको निर्वाचन सकिएपछि पहिलोपटक शुक्रबार भर्चुअल मार्फत केन्द्रीय समिति बैठक बस्न लागेको हो ।

शुक्रबार बेलुका ६ बजे एजेण्डासहित भर्चुअल रुपमा बस्ने बैठकमा प्रस्तुत गर्ने एजेण्डा भने अहिलेसम्म केन्द्रीय सदस्यहरुले नपाएको बताइएको छ । नेताहरुले गठबन्धनको प्रभावकारितसहित स्थानीय तह निर्वाचन, केन्द्रीय समितिको पूर्णता र एमसीसीको विषयमा मत राख्नेछन् ।

शुक्रबारको भर्चुअल बैठक सकिएपछि पार्टी पदाधिकारीसहित स्थायी समिति, पोलिटब्युरो,मधेस प्रदेशको पूर्ण र जनवर्गीय संगठनलाई समेत पूर्णता दिने विषयमा छलफल हुने बताइएको छ । पार्टी कमिटी र जनवर्गीय संगठनले पूर्णता पाएमा आगामी असार १५ गते भौतिक रुपमा केन्द्रीय समिति बैठकमार्फत आगामी एजेण्डाबारे निर्णय गराउने अध्यक्ष प्रचण्डको तयारी छ ।