फेरी रोकियो फोहोर, नयाँ सम्झौता नमान्ने भन्दै आन्दोलनमा उत्रिए स्थानीय

२४ जेठ, काठमाडौं । सोमबार सरकारी पक्षसँग भएको सहमति अमान्य भएको भन्दै स्थानीयले फेरी फोहोर फाल्न अवरोध पुर्याएका छन् । बन्चरेडाँडा ल्यान्डफिल साइट प्रभावित क्षेत्र सरोकार समितिले सहमति नमान्ने भन्दै आन्दोलन सुरु गरेको छ ।

सोमबार सिंहदरबारमा भएको सहरी विकास मन्त्रालय, काठमाडौं महानगरपालिका, धुनिबेंसी नगरपालिका, ककनी गाउँपालिकाबीच भएको सहमतिलाई अमान्य भएको भन्दै समिति पुनः आन्दोलनमा उत्रिएको हो ।

सोमबार प्रभावित क्षेत्रका स्थानीय पालिकासँग महानगर र मन्त्रालयले सहमति गरेपछि उपत्यकाको फोहोर विसर्जन हुने अपेक्षा गरिएपनि स्थानीयवासीले त्यसको विरोध गर्दै मंगलबार बिहानदेखि बन्चरे डाँडामा भेला भएका छन् । फोहोर विसर्जनका लागि गएका टिपरहरुलाई उनीहरुले अवरोध गरेका छन् ।

सहमतिबमोजिम आज बिहानदेखि काठमाडौंमा करिब एक महिनादेखि थुप्रिएको फोहोर उठाउन थालिएको थियो । यता फोहोर उठाएर केही गाडी सिसडोल जाने क्रममा रहेकै बेला स्थानीयले फेरि अवरोध गरेका हुन् ।

स्थानीय श्रीराम ढुंगानाका अनुसार सोमबार बेलुका काठमाडौंमा भएको सम्झौता स्थानीयले अस्वीकार गरेका छन् । यसअघि भएका सम्झौता पूर्ण कार्यान्वयनको माग उनीहरुले गरेका छन् । उनका अनुसार स्थानीयलाई सहमति गर्दा बेवास्ता गरिएको छ । जसरी प्रावधिक टोली गठन गरिनुपर्ने हो त्यसरी नभएको उनको भनाइ छ ।