लोसपाले बालुवाटार पुगेर प्रधानमन्त्रीसँग माग्यो रेशम चौधरीको रिहाइ

२४ जेठ, काठमाडौं । लोकतान्त्रिक समाजवादी पार्टी (लोसपा) ले सरकारसँग जेलमा रहेका रेशम चौधरीको रिहाइको माग गरेको छ । लोसपाले चौधरीको रिहाइसहित विभिन्न ११ बुँदे माग पनि प्रधानमन्त्री शेरबहादुर देउवालाई बुझाएको छ ।

मंगलबार बिहान प्रधानमन्त्री निवास बालुवाटार पुगेर लोसपाका नेताहरूले नागरिकता विधेयक, मधेस तथा थरुहट आन्दोलनकारीमाथि लागेका मुद्दा फिर्ता र रिहाइ तथा सम्झौता कार्यान्वयन लगायतका माग समेटिएको ज्ञापनपत्र बुझाएका छन् ।

ज्ञापनपत्रमा देउवा नेतृत्वको सरकार निर्माण हुने बेला गरिएका प्रतिबद्धता कार्यान्वयन गर्न भनिएको छ । संविधानअनुसार जन्मसिद्ध नागरिकका सन्तानलाई अबिलम्व नागरिकता प्रमाणपत्र प्रदान गर्ने र वैवाहिक अंगीकृतसम्बन्धी हालसम्म कायम रहेको कानुनी व्यवस्थालाई निरन्तरता दिनुपर्ने माग लोसपाको छ ।

उसले मधेस र थरुहट आन्दोलनकारीमाथि लगाइएका मुद्दा फिर्ता र निलम्बित सांसद रेशम चौधरीलाई यथासक्य चाँडो रिहाइ गर्न माग गरेको छ । लोसपाले किसानलाई मलखादको व्यवस्था अविलम्ब गर्न पनि सरकारसँग माग गरेको छ ।

प्रधानमन्त्रीलाई ज्ञापनपत्र बुझाउन अध्यक्ष ठाकुर, नेताहरू राजेन्द्र महतो, शरतसिंह भण्डारी, अनिल झा, लक्ष्मणलाल कर्ण, चन्दा चौधरी, उमाशंकर अरगरियालगायतका नेता बालुवाटार पुगेका थिए । जवाफमा प्रधानमन्त्री देउवाले सरकार माग पुरागराउने प्रयासमा रहेको बताएका थिए ।