पर्सामा सत्ता गठबन्धनमा ट्विस्ट, एमालेसँग मिलेर जिससको नेतृत्वमा जसपाको उम्मेद्वारी

२४ जेठ, बीरगञ्ज । जिल्ला समन्वय समिति पर्साको नयाँ नेतृत्व चयनका लागि मंगलबार भएको उम्मेद्वारी दर्ताले जिल्लास्थित सत्तारुढ गठबन्धनमा ट्विस्ट आएको छ ।

बीरगञ्ज महानगरको मेयर उपमेयर र बोर्ड सदस्यको निर्वाचनमा कांग्रेससँग गठबन्धन गरेको जसपाले जिल्ला समन्वय समितिको निर्वाचनमा भने एमालेसँग गठबन्धन गर्न पुगेको छ ।

समन्वय समितिको प्रमुख र ३ सदस्य लिँदै जसपा एमालेसँग गठबन्धन गर्न पुगेको हो । महानगरमा नराम्रोसँग पराजित भएको एमाले समन्वय समितिमा भने उपप्रमुखमै भए पनि चित्त बुझाउने गरी नेतृत्व जसपालाई सुम्पन तयार भएको हो ।

महानगरमा कांग्रेस र जसपा मिलेर मेयर उपमेयर तथा बोर्ड सदस्य भागवण्डा लगाएका थिए । तर समन्वय समितिमा भने कांग्रेसले नेतृत्वको दावी गरेपछि जसपा एमालेसँग मिल्दै नेतृत्व हत्याउन पुगेको हो । १४ स्थानीय तहमध्ये १२ प्रमुख उपप्रमुख कांग्रेसको हुँदा एमालेको १०, जसपाको ५ र लोसपाको १ रहेको छ ।

बढी मत आफुसँग रहेकाले नेतृत्व आफूले पाउनु पर्ने सत्तागठबन्धनमा कांग्रेसले दावी गरेपछि नेतृत्व जसले दिन्छ उसैसँग जिससको निर्वाचनमा तालमेल गर्ने रणनीति अपनाएर जसपाले छलफल अघि बढाएको थियो ।

एमाले जसपालाई नेतृत्व सुम्पदै उपप्रमुखमा चित्त बुझाउन राजी भए पछि जिल्ला समन्वय समितिको आउँदो २७ गते हुने निर्वाचनमा एमाले र जसपाबीच तालमेल भएको जसपाका एक नेताले दिशा निर्देशलाई बताए ।

जस अनुसार जिल्ला समन्वय समितिको प्रमुखका लागि जसपाले वीरगञ्ज १५ बाट वडासदस्यमा निर्वाचित निरन्जन साह सोनार ‘अजय सर्राफ’लाई उम्मेद्वार बनाएको छ । उपप्रमुखका लागि भने बहुदरमाई नगरपालिकाका पुरन कुर्मीलाई एमालेले अघि सारेको छ ।

एमालेले उपप्रमुखसहित ४ सदस्य लिएको छ भने जसपाले प्रमुखसहित ३ सदस्य भागमा पाएको छ । यसैबीच नेपाली कांग्रेसले पनि जिसस नेतृत्वका लागि आफ्नो एकल उम्मेद्वारी दिएको छ ।

कांग्रेसले जिराभवानी गाउँपालिकाको कार्यपालिका सदस्यसमेत रहेका सरोज चौरसियालाई प्रमुखको उम्मेद्वार बनाएको छ भने वीरगञ्ज वडा नम्बर ९ की सदस्य कुमारी सोनीलाई उपप्रमुखको उम्मेद्वार बनाएको छ ।

यो निर्वाचनमा जसपा नै निर्णायक रहेकाले एमाले र कांग्रेस जसपालाई हातमा लिन लागि परेका थिए । महानगको मेयर छाडेको र बोर्डमा पनि समान हिस्सा दिएको कांग्रेसले जिससमा भने आफ्नो नेतृत्व ल्याउन चाहेको थियो ।

तर जसपाले नेतृत्व नछाड्ने अडान लिँदै एमालेसँग तालमेल गर्न पुगेपछि कांग्रेस बहुमत नभए पनि उम्मेद्वारी दर्ता गरेर औपचारिकता निभाउन बाध्य भएको छ ।

एमाले र जसपाले तालमेल गरेसँगै उनीहरुको मतसंख्या १५ भएको छ । कांग्रेस एक्लैसँग १२ छ । त्यसैले निर्वाचनमा प्रतिनिधिले मत क्रस नगरे जित एमाले जसपा गठबन्धनको हुने देखिन्छ । यसले विगतमा पनि जिससमा पुग्न नसकेको कांग्रेस यस वर्ष पनि जिससमा पुग्नबाट बन्चित हुने देखिएको छ ।