राजसंस्थाको पुनःस्थापना सम्भव छैन, पारसका निम्ति कोही पनि सती नगए हुन्छः कमल थापा

२६ जेठ, बुटवल । राप्रपा नेपालका अध्यक्ष कमल थापाले समाप्त भइसकेको राजसंस्था फकर्ने सम्भावना नरहेकाले देशको शासकीय स्वरुपमा आमुल परिवर्तन गर्नुपर्ने बताएका छन् । उनले संघीय संरचनामा प्रत्यक्ष निर्वाचित प्रधानमन्त्रीको व्यवस्था गरी अधिकारसम्पन्न स्थानीय तहको संरचना निर्माण तर्फ दलहरु लाग्नुपर्ने बताएका छन् ।

बिहीबार बुटवलमा आयोजित पत्रकार सम्मेलनमा थापाले राष्ट्रपति संघीय संसद्बाट निर्वाचित र पूर्ण समानुपातिक निर्वाचन प्रणाली हुनुपर्नेमा जोड दिँदै नेपालमा राजसंस्थाको पुनःस्थापना सम्भव नरहेको बताए ।

उनले राजसंस्था नफर्कने र उत्तराधिकारीका रुपमा पारस शाहका लागि कोही पनि सती जान आवश्यक नरहेको बताए । थापाले राप्रपाका अध्यक्ष राजेन्द्र लिङ्देनतर्फ संकेत गर्दै राजसंस्थाको एजेण्डा छोडेर आउनेसँग आफु पार्टी एकताका लागि तयार भएको पनि बताए ।

उनले राजसंस्थाको एजेण्डा समयमै नछोड्नाले आफ्नो राजनीतिनै बर्बाद हुने अवस्था देखेपछि आफुले राजतन्त्र पुनःस्थापनाको विषयलाई छोडेर हिन्दुराज्यको एजेन्डा बोकेको बताए । हिन्दुराज्य र धर्मनिरपेक्षताका विषयमा जनमतसंग्रह गर्नुपर्ने उनको भनाई थियो ।

राप्रपा नेपालमा रहेर राजसंस्थाको एजेण्डा बोक्दा निर्मलनिवासदेखि पूर्वराजाका सचिवले समेत निरन्तर पार्टीमाथि हस्तक्षेप गरेको र सहन नसकेर आफू अलग्गिएको बताए । आफू कुनै एक व्यक्तिको पछि सती नजाने भन्दै उनले कोही पनि रासंस्था फर्कन्छ भनेर पारसको पछि लाग्नु भुल हुने बताए ।

उनले पारै नलाग्ने र असम्भव कुराको पछि लागेर पारसका निम्ति सती नजाने भन्दै पारस शाह देशका लागि योग्यनै नरहेको जिकिर गरे । नेपालमा धर्म परिवर्तनको क्रम निकै बढेको र अरू दलले यसतर्फ ध्यान नदिएकाले राप्रपा नेपालले यो एजेन्डा बोकेको उनको भनाइ छ ।