बुधबार ६० अंकले बढेको शेयरबजार बिहीबार दोहोरो अंकले लाग्यो ओरालो

२६ जेठ, काठमाडौं । बिहीबार शेयरबजार नेप्से परिसूचक दोहोरो अंकले घटेको छ । जेठमा निरन्तर घटेको बजार बुधबार केही सम्हालिएको थियो । तर, बिहीबार भने यो टिक्न सकेन । बुधबार ६० अंक बढेको शेयरबजार मापक परिसूचक नेप्सेको वृद्धि दुई दिन पनि टिकेन ।

यसअघिका दुई साता लगातार घटेको बजार बुधबार एक्कासी बढेपछि कतिपयले बजार केही दिन उकालो लाग्ने अनुमान गरेका थिए ।बिहीबार बजार खुल्दा त्यस्तै संकेत पनि देखिएको थियो । पहिलो घण्टा केही बढेर कारोबार भएको थियो । त्यसपछि निरन्तर घटेको बजार अन्त्यमा १७.५८ अंकले ओरालो लागेर २०६२.८६ विन्दुमा झर्यो ।

बिहीबार सबै उपसमूह राताम्य भए । सबैभन्दा धेरै वित्त र विकास बैंकका लगानीकर्ताले गुमाए । कुल २२९ कम्पनीको ३० हजार ७६२ कारोबारबाट ४१ लाख ५ट हजार १०४ कित्ता शेयर किनबेच भएको छ । यस दिन कारोबार रकम १ अर्ब ४७ करोड २६ लाख ९० हजार ५५४ रुपैयाँ रहेको छ ।

बिहीबार उपकार लघुवित्तको कारोबारमा सकारात्मक सर्किट लाग्यो भने बलेफी हाइड्रोपावरको मूल्य ९.९९ प्रतिशतले बढेर २४६ रुपैयाँ पुग्यो । यसदिन बढी घट्नेमा नेपाल इन्भेष्टमेन्ट बैंक, प्रमोटर शेयरको मूल्य ६.६१ प्रतिशतले घटेर २३६ रुपैयाँ, सिंगटी हाइड्रोपावरको कम्पनीको मूल्य ५.३४ प्रतिशतले घट्यो ।

बैंकिङ ५, विकास बैंक ७३, फाइनान्स ३६, होटल तथा पर्यटन ३९, जलविद्युत ४०, जीवन बीमा २८, उत्पादन ४९, माइक्रोफाइनान्स ३१, निर्जीवन बीमा ७८, अन्य २४ र ब्यापार उपसमूह १२ अंकले घटेका छन् । कारोबार भएका कुल ३१ कम्पनीको मूल्य बढ्दा १६० को घट्यो भने ५ को स्थिर रह्यो ।

उपकार लघुवित्त र बलेफी हाइड्रोपावरको मूल्य १० प्रतिशत बढ्यो । कारोबार रकमका आधारमा कुमारी बैंक, हिमालयन डिस्टिलरी, अरुणकाबेली, एसियन लाइफ इन्स्योरेन्स र नेपाल लाइफ इन्स्योरेन्स क्रमिक रुपमा अगाडि रहे ।