आयल निगमद्वारा पेट्रोलमा ८, डिजेल र मट्टितेलमा प्रतिलिटर १२ रुपैयाँ मूल्यवृद्धि

२६ जेठ ,काठमाडौं । सडकदेखि सदनसम्म चर्को विरोध भइरहेका बेला नेपाल आयल निगमले पेट्रोलियम पदार्थको मूल्य बढाएको छ । निगमले बिहीबार मध्यरातदेखि लागू हुने गरी पेट्रोलमा प्रतिलिटर ८ रुपैयाँ र डिजेल, मट्टितेलमा १२/१२ रुपैयाँले मूल्य बढाएको हो ।

बढेको मूल्यअनुसार अब पेट्रोल प्रतिलिटर १ सय ७८ र डिजेल र मट्टितेल प्रतिलिटर १ सय ६५ रुपैयाँ पुगेको छ । खाना पकाउने ग्यासको भाउ भने बढाइएको छैन् । भारतीय आयल कर्पोरेसनबाट मूल्य बढेर आएको भन्दै निगमले पेट्रोल, डिजेल र मट्टितेलको मूल्य बढाएको हो ।

यसअघि जेठ १९ गते पूर्वाधार कर बराबर प्रतिलिटर १० रुपैयाँ पेट्रोल, डिजेल र मट्टितेलमा मूल्य समायोजन गरेको थियो । ग्यासमा दुइथरी मूल्य र सिलिण्डर दिने भन्दै निगमाले अध्यायन गरिरहेको छ ।