सशस्त्रमा व्यक्ति विशेषका लागि नियमावली संशोधनको तयारी

३१ जेठ, काठमाडौं । सशस्त्र प्रहरी बलमा व्यक्ति विशेषलाई लक्षित गरेर नियमावली संशोधनको तयारी भएको छ । एसपी भएको ३ वर्षपछि एसएसपीको बढुवा हुने प्रावधान राखेर नियमावली संशोधन गर्न लागिएको हो । हाल एसपी भएको ४ वर्षपछि मात्रै एसएसपीमा बढुवा हुन पाउने प्रावधान रहेको छ ।

सोही प्रावधान अनुसार सोमबार सशस्त्र प्रहरीका ९ जना उपरीक्षक (एसपी) वरिष्ठ उपरीक्षक (एसएसपी) मा बढुवाका लागि सिफारिस गरिएको छ । एसपी भएको चार वर्षपछि उनीहरु एसएसपीमा बढुवा सिफारिस भएका हुन् । बढुवा समितिले दीपेन्द्र शाह, सुरेशकुमार श्रेष्ठ, पुरुषोत्तम थापा, अन्जनीकुमार पोख्रेल, दीपक अधिकारी, कृष्ण ढकाल, मनिष थापा, विनोदराज श्रेष्ठ र प्रकाश थापालाई बढुवा गर्न सिफारिस गरेको हो । यसअघि उनीहरु कामु एसएसपी थिए ।

अहिले सशस्त्र प्रहरीमा १३ जना कामु एसएसपी रहेका छन् । उनीहरुको बढुवा अवधि नपुगेका कारण कामु रहेका हुन् । त्यसमा प्रधानमन्त्री शेरबहादुर देउवाका स्वकीय सचिव भानु देउवाका बहिनी ज्वाई दीपेन्द्र कुँवर लगायतका १३ जना रहेका छन् । हाल उनै कुँवरले नियमावली संशोधन गराई आफू बढुवा हुने तयारीमा लागेका छन् ।

‘एसएसपीमा बढुवा हुन ४ वर्ष सेवा गरेको हुनुपर्ने नियमलाई हटाएर अब एसएसपीमा बढुवा हुनका लागि ३ वर्ष सेवा गरेको भएपनि योग्य मानिने व्यवस्था गर्न लागिएको छ’, मन्त्रालय स्रोतले भन्यो । सशस्त्र प्रहरी नियमावली, २०७२ को नियम ४० को उपनियम १ मा ‘सशस्त्र प्रहरी सेवामा बढुवाका लागि सम्भाव्य उम्मेदवार हुन बढुवा हुने श्रेणी वा तहभन्दा एक श्रेणी वा तह मुनिको पदमा चार वर्ष सेवा अवधि पूरा भएको हुनुपर्नेछ’ भनिएको छ ।

त्यसैगरी नियम ४० को उपनियम २ मा ‘उपनियम १ मा जुनसुकै कुरा लेखिएको भएतापनि सशस्त्र प्रहरी नायव महानिरीक्षक र सोभन्दा माथिल्लो पदमा बढुवा हुन न्युनतम सेवा अवधिको हद लाग्ने छैन’ भन्ने उल्लेख छ । अर्थात् एसएसपीसम्म बन्न त्योभन्दा तल्लो तहमा कम्तीमा चार वर्ष सेवा पूरा गरेको हुनुपर्नेछ भने डीआईजी बन्न वा त्योभन्दा माथिल्लो पदमा जानका लागि सेवा अवधि लागू नहुने कुरा उल्लेख छ । तर सशस्त्र प्रहरीले यो व्यवस्थालाई हटाएर एसएसपीमा बढुवाका लागि आवश्यक सेवा अवधि चार वर्षलाई घटाएर तीन वर्ष कायम गर्न संशोधनको प्रस्ताव गरेको छ ।

अहिले भने एसएसपीको बढुवा अवधि ३ वर्ष बनाउदा अहिलेका कामु एसएसपी दीपेन्द्र कुँवरलाई सहज बनाउने थरी संशोधन गर्न लागिएको छ । उनी यसैपटक डीआईजी हुने र निकट दिनमा आईजीपी हुने गरी तयारी थालेका छन् । कामु एसएसपी कुँवरले आफ्ना व्याचका सबैलाई टप गरेर कन्फर्म एसएसपी हुने दाउमा लागेका छन् । उनले सबै प्रकारका नियमावली संशोधन गर्न दबाब दिइरहेका छन् ।

यसअघि नियमावली संशोधन गरेर सेवा अवधि घटाउनका लागि सशस्त्र प्रहरीका तत्कालिन महानिरीक्षक शैलेन्द्र खनालले समिति गठन गरेका थिए । सुझाव दिनेगरी गठन गरिएको समितिमा तत्कालिन आईजीपी खनाल निकट भनेर चिनिएका डीआईजी नारायण दत्त पौडेल संयोजक थिए ।

आईजीपी अर्यालले सेवा अवधि घटाउने लगायतका प्रस्ताव राखेर तयार पारेको नियमावली संशोधन प्रस्तावसहितको पत्र गृह मन्त्रालयको प्रहरी प्रशासन शाखामा पठाइसकिएको भएपनि अहिले विचराधीन अवस्थामा छ । समितिले एसएसपीमा बढुवाका लागि सेवा अवधि तीन वर्ष बनाउने गरी नियमावली संशोधनको सुझावसहितको प्रतिवेदन दिएको थियो ।