प्रदेशको बजेट आज, पुराना योजना र मुख्यमन्त्रीका प्रचारमुखी कार्यक्रममै सबैको प्राथमिकता

१ असार, काठमाडौं ।  प्रदेश सरकारले बुधबार आगामी आर्थिक वर्षको बजेट सार्वजनिक गर्दैछन् । सातै प्रदेशका सरकारको पाँच वर्षे कार्यकालको यो नै अन्तिम बजेट पनि हो । बजेटमा सबै प्रदेशका उदेश्य भने पुराना कार्यक्रमलाई निरन्तरता, मुख्यमन्त्रीका नाममा रहेका योजनालाई प्राथमिकता मात्र रहेका छन्।

आगामी आर्थिक वर्षका लागि प्रदेश १ ले ३८ अर्ब, मधेस प्रदेशले ३४ अर्ब, बागमती प्रदेशले ६० अर्ब, गण्डकी प्रदेशले ३० अर्ब ९६ करोड, लुम्बिनी प्रदेशले ४१ अर्ब, कर्णाली प्रदेशले ३६ अर्ब ५४ करोड र सुदूरपश्चिम प्रदेशले ३४ अर्ब रुपैयाँ बराबरको बजेट ल्याउने तयारी गरेका छन् ।

पुरानै योजनाको निरन्तरता, मन्त्री तथा मुख्यमन्त्रीका नाममा प्रचारमुखी र वितरणमुखी कार्यक्रमहरुलाई प्राथमिकतामा परेका छन् ।अन्तरसरकारी वित्त व्यवस्थापन ऐन– २०७४ अनुसार सबै प्रदेशले असार १ मा आगामी आर्थिक वर्षको आयव्यय (बजेट) संसदमा पेस गर्नुपर्ने व्यवस्था छ ।

बजेट ल्याउनुपर्ने मिति नै कानुनले तोकिदिएपछि सबै प्रदेशले आगामी आर्थिक वर्ष ०७९/८० का लागि आज बजेट ल्याउन लागेका हुन् ।सबैजसो प्रदेशले आफ्नो आम्दानी र खर्च क्षमतालाई भुलेर आगामी आर्थिक वर्षका लागि ठूलै आकारको बजेट ल्याउँदैछन् ।

बजेट निर्माणमा संलग्न अधिकारीहरूको भनाइ अनुसार केही आशा जगाउने कार्यक्रम रहे पनि धेरैजसो पुरानै योजनाको निरन्तरता, मन्त्री तथा मुख्यमन्त्रीका नाममा प्रचारमुखी र बजेट वितरणमुखी कार्यक्रमहरूले प्राथमिकता पाएका छन् ।