राष्ट्रपति भण्डारी र प्रधानसेनापतिबीच एक घण्टा भेटघाट !

३ असार काठमाडौं । मुलुकमा अहिले अमेरिकी सरकारले स्टेट पार्टनरसीप प्रोग्राम (एसपीपी)मा नेपाली सेनालाई सहभागिता जनाउन आग्रह गरेको चर्चा चलिरहेको छ । संसददेखि सदनसम्म यही विषयले प्रवेश पाइरहेका बेला बुधबार साँझ राष्ट्रपति विद्यादेवी भण्डारी र प्रधानसेनापति प्रभुराम शर्माबीच भेटघाट भएको छ । बुधबार साँझ राष्ट्रपतिलाई भेट्न प्रधान सेनापति पुगेको स्रोतको दावी छ ।

राष्ट्रपति भण्डारी नेपाली सेनाको परमाधिपति हुन । ‘राष्ट्रपति विद्यादेवी भण्डारीसँग पनि प्रधानसेनापति शर्माले एक घण्टा भेटघाट गर्नु भएको हो,’स्रोतले भन्यो । उनीहरुबीच नेपालको सार्वभौमिकता, स्वाभिमान तथा राष्ट्रियतामा आएको उत्तारचढावको बारेमा कुराकानी भएको स्रोतको दावी छ ।

ऋहिले एमालेका अध्यक्ष केपी शर्मा ओली पहिलोपटक प्रधानमन्त्री हुँदा २०७२ सालमा सरकारको नेतृत्व गरिरहेकै अवस्थामा नेपाली सेनाका प्रधानसेनापति राजेन्द्र क्षत्रीले अमेरिकासँग ‘नेसनल गार्ड स्टेट पार्टनरसिप प्रोग्राम (एनजीएसएसपी)’ सम्झौताका लागि पत्राचार गरेको पत्र सार्वजनिक भैरहेको छ ।

सो पत्रको आधिकारिकता पुष्टि भैसकेको छैन । यो पत्र सार्वजनिक हुनु अघि बुधबार प्रधानसेनापति राष्ट्रपति भण्डारीलाई भेट्न शितल निवास पुगेका हुन् । सो पत्रबारे नेपाली सेनाले कुनै धारणा सार्वजनिक गरेको छैन । यदि सो पत्र सही ठहरेमा तत्कालिन प्रधानसेनापति राजेन्द्र क्षेत्रीमाथि कोर्ट मर्शल लागु हुनेछ ।