शेरबहादुर देउवा मैले जस्तो फ्रेस चुनाव जितेर प्रधानमन्त्री बन्नुभएको छैन, जालझेलबाट मात्रै होः ओली

३ असार,काठमाडौं । नेकपा एमालेका अध्यक्ष केपी शर्मा ओलीले नेपाली कांग्रेससँंग एमालेको जस्तो देश बनाउने नीति र सोच नभएकाले शेरबहादुर देउवा कहिलै पनि फ्रेस चुनाव जितेर प्रधानमन्त्री बन्न नसकेको बताएका छन् । उनले एमालेले बनाएको देश बनाउने नीतिलाई अन्य दलहरूले तोडमडोर गरेर काम चलाउँदै आएको दाबी गरेका छन् ।

स्थानीय तहका प्रमुख तथा उपप्रमुखका लागि राजधानीमा आयोजित प्रशिक्षण कार्यक्रममा ओलीले शेरबहादुर देउवाले कहिल्यै पनि फ्रेस निर्वाचनबाट निर्वाचित प्रधानमन्त्री नभएको भन्दै देउवा जहिले पनि जालझेल र छलकपटबाट मात्रै प्रधानमन्त्री भएको बताए ।

उनले भने, ’शेरबहादुर देउवा फ्रेस चुनाव जितेर कहिले पनि प्रधानमन्त्री हुनु भएको छैन । पार्टीभित्रको जालझेल, संसदभित्र छलकपट र अदालतले अवसर दिएको अवस्थामा मात्रै अहिलेसम्म प्रधानमन्त्री हुनु भएको छ । उनले आगामी दिनमा पनि फ्रेस चुनाव जितेर देउवालाई प्रधानमन्त्री बन्न गाह्रै भएको बताए ।

विभिन्न विषयमा अन्य दलले नीति बनाउन नसकेको तर एमालेका नीतिबारे टिका टिप्पणी गर्ने गरेको उनको आरोप थियो । उनले आफूहरूले लिएको नीतिले वैकल्पिक राजनीतिक, आर्थिक र वैदेशिक सम्बन्धी नीति दिन सक्ने तर अन्यले तोडमोडर गरेर विकृत पार्ने गरेको बताए ।उनले एमाले बाहेक अन्य कुनै पनि पार्टीसँग नीति,सोच र राष्ट्र निर्माणको उदेश्य के हो भन्ने नै नभएको दावी गरे ।