प्रेसर बढेपछि गठबन्धनमै एसपीपी अस्वीकारको ड्राफ्ट बनाउने प्रधानमन्त्रीको तयारी

५ असार, काठमाडौं । प्रधानमन्त्री शेरबहादुर देउवाले सत्ता गठबन्धन दलको बैठक राखेर अमेरिकी स्टेट पार्टनरसिप प्रोग्राम (एसपीपी) अस्वीकारको पत्रको ड्राफ्ट बनाउने भएका छन् । यसका लागि गठबन्धनका बोलाउन तयारी भइरहेको बालुवाटार स्रोतले जानकारी दिएको छ ।

प्रतिपक्षी दल नेकपा एमाले र सत्ता गठबन्धनमा रहेका प्रमुख तीन दलले अमेरिकी स्टेट पार्टनरसिप प्रोग्राम (एसपीपी) अस्वीकार गरेको उल्लेख गर्दै पत्र लेख्न प्रधानमन्त्री शेरबहादुर देउवामाथि दबाब दिएपछि उनले बैठक ठाकेर त्यसको ड्राफ्ट बनाउने भएका हुन् ।

गठबन्धनमा रहेका माओवादी केन्द्र, एकीकृत समाजवादी र जनता समाजवादी पार्टीका शीर्ष नेताहरूले शनिबार छुट्टै बैठक गरेर एसपीपीबारे जनतालाई स्पष्ट पार्नका लागि श्वेतपत्र जारी गर्न आग्रह गर्ने निर्णय गरेका थिए । प्रधानमन्त्री देउवाले एसपीपी अगाडि नबढाउने प्रतिबद्धता जनाए पनि पत्राचार गर्ने विषयमा अहिलेसम्म गठबन्धनबीच छलफल भएको छैन् ।

माओवादी अध्यक्ष पुष्पकमल दाहाल, एकीकृत समाजवादीका अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादवले एसपीपीकै विषयमा आइतबार प्रधानमन्त्री देउवासँग भेट्ने कार्यक्रम छ ।

प्रधानमन्त्रीको अमेरिका भ्रमणमा कुनै आशंका नहोस् भनेर त्यसपूर्व नै पत्राचार र श्वेतपत्र जारीको आग्रह गर्ने रणनीति उनीहरूले बनाएका हुन् । प्रधानमन्त्री देउवासँग छलफल गरेर यसबारे थप निर्णय लिने योजना तिन दलका नेताहरुको छ ।

स्रोतका अनुसार प्रधानमन्त्री देउवाको अमेरिका भ्रमणका बेला कुनै सम्झौता हुने हो कि भन्ने भय सत्ता गठबन्धनका अन्य दलमा छ । सोही कारण देउवाले उनीहरुलाई राखेर पत्रको ड्रफ्ट बनाउने भएका हुन् ।