कांग्रेस र माओवादीमा मिलाएर प्रधानमन्त्रीले छिट्टै मन्त्रीहरू परिवर्तन गर्नुहुन्छः माधव नेपाल

५ असार, काठमाडौं । नेकपा एकीकृत समाजवादीका अध्यक्ष माधवकुमार नेपालले प्रधानमन्त्री शेरबहादुर देउवाले नेपाली कांग्रेस र नेकपा माओवादीलाई पनि मिलाएर चाँडै मन्त्रीमण्डल फेरबदल गर्ने बताएका छन् । उनले गठबन्धनका अरु दलसँग छलफल गर्न केहि दिन प्रधानमन्त्रीले समय मागेपनि अब चाँडै फेरबदल हुने दावी गरेका छन् ।

आइतबार बिहान प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधवकुमार नेपालबीच भएको छलफलमा प्रधानमन्त्रीले नै मन्त्रीहरू छिट्टै फेरबदल गर्ने जानकारी गराएको बताए ।

बैठकपछि विभिन्न सञ्चारमाध्यामका सम्पादकहरूसँगको छलफलमा अध्यक्ष नेपालले पार्टीमा पहिले भएको सहमति बमोजिम नै मन्त्रीहरू फेरबदल हुने बताए । मन्त्रीहरू फेरबदलको विषयमा पार्टीको निर्णयले काम गर्ने उनको भनाइ छ ।
उनले भने,‘छ महिनाभन्दा पहिले नै पनि मन्त्री परिवर्तन गर्ने कि भनेर चर्चा नचलेको पनि होइन, छ महिनासम्म त काम गर्न दिनुस् भनेर पनि उहाँहरूले नै भन्नुभएको हो, अहिले छ महिनामात्रै होइन, आठ महिना पुगेपछि हामीले परिवर्तन गर्ने निर्णय गरेका हौँ । मन्त्री फेरबदलमा केही ढिलाइ भइरहेको छ ।’

उनले नेपाली कांग्रेस र नेकपा माओवादी केन्द्रले केही दिन समय मागेपछि मन्त्रिमण्डल हेरफेर गर्न ढिलाइ भएको बताए । कांग्रेस र माओवादी केन्द्रले केही दिन पर्खिन माग गरेकाले केही दिन पर्खिएका हौँ भन्दै उनले आइतबारको छलफलमा प्रधानमन्त्रीले छिट्टै मन्त्रीहरू परिवर्तन गर्छु भनेको बताए ।