इन्धनमा फेरी मूल्यबृद्धिः पेट्रोलको प्रतिलिटर १९९, डिजेल र मट्टीतेलको १९२ पुग्यो

६ असार, काठमाडौं । नेपाल आयल निगमले इन्धनको मूल्य फेरी बढाएको छ । गएरातीदेखि लागु हुने गरी इन्धनको मूल्य बढाइएको हो । आइतबार बसेको निगमको सञ्चालक समिति बैठकले डिजेल र मट्टीतेलमा प्रतिलिटर २७ र पेट्रोलमा प्रतिलिटर २१ रुपैयाँ मूल्य बढाएको हो ।

मूल्य बढेसँगै पेट्रोलको मूल्य १९९ पुगेको छ भने डिजेल र मट्टीतेलको मूल्य १९२ पुगेको छ । निगमले खाना पकाउने ग्याँसको मूल्य भने बढाएको छैन । निगमले हवाई इन्धनतर्फ आन्तरिकमा १९ र अन्तर्राष्ट्रियमा एक सय अमेरिकी डलरले मूल्य बढाएको छ ।

निगमले डिजल र पेट्रोलमा उच्च वृद्धिसहित भारतबाट इन्धनको नयाँ मूल्यसूची प्राप्त भएपछि इन्धनको भाउ बढाएको बताएको छ । भारतीय आयल निगम (आईओसी) ले पठाएको नयाँ मूल्यसूचीअनुसार पेट्रोलको लागत एक लिटरमा २०९ रुपैयाँ २८ पैसा र डिजलको लागत मूल्य २०२ रुपैयाँ १६ पैसा पुगेको छ ।

निगमका प्रवक्ता विनितमणि उपाध्यायका अनुसार मट्टीतेलको लागत मूल्य १४७ रुपैयाँ ९९ पैसा पुगेको छ । यो हालसम्मै उच्च मूल्य हो । नयाँ मूल्यसूची अनुसार खाना पकाउने ग्याँसको लागत २५ सय ५१ रुपैयाँ १५ पैसा पुगेको छ ।