एसपीपीबारे महामन्त्रीद्वय थापा र शर्माको प्रधानमन्त्रीसँग छलफल, सर्वपक्षीय सहमतिबाट पत्राचार गर्न सुझाव

६ असार, काठमाडौं । प्रधानमन्त्री तथा नेपाली कांग्रेसका सभापति शेरबहादुर देउवाले पार्टीका महामन्त्रीद्वय गगन थापा र विश्वप्रकाश शर्मासँग अमेरिकी सेनाको स्टेट पार्टनरसीप प्रोग्राम (एसपीपी) बारे छलफल गरेका छन् ।

देउवासँग छलफलका लागि सोमबार बिहान थापा र शर्मा बालुवाटार पुगेका थिए । प्रधानमन्त्री देउवाले बाहिरबाट दवाव आएको र पार्टीबाट पनि निर्णय गराउनुपर्ने भएकाले एसपीपीबारे कसरी अगाडि जाने भन्दै महामन्त्रीद्वयसँग राय मागेका थिए ।

छलफलमा नेपाल कुनै पनि देशको सैन्य संगठनसँग जोडिन नसक्ने भएकाले एसपीपीमा नेपाललाई आबद्ध गराउन नमिल्ने भन्दै शर्मा र थापाले सबै दलसँगको छलफलबाट आबद्ध हुन नसक्ने भन्दै नेपालका तर्फबाट पत्राचार गर्न प्रधानमन्त्री देउवालाई सुझाव दिएका छन् ।

देउवालाई उनीहरुले राष्ट्रिय सहमति निर्माण गरी एसपीपीमा कहिल्यै सहभागी नहुने गरी पत्राचार गर्नुपर्ने सुझाव दिएको महामन्त्री शर्माले बताएका छन् । उनले एसपीपी सम्बन्धमा सरकारको तर्फबाट आवश्यक प्रक्रिया पुर्याएर यो प्रकरण नदोहोरिने गरी पत्राचार गर्न भनिएको बताए ।

यसबारे नीति तय गर्दा प्रमुख प्रतिपक्ष लगायत राजनीति दललाई बोलाए साझा धारणा तय गर्न प्रारम्भ गरी सबैलाई छलफलमा सहभागी गराउन सुझाव दिएको र यसमा प्रधानमन्त्री सकारात्मक रहेको बताइएको छ ।

प्रधानमन्त्री शेरबहादुर देउवाको अमेरिका भ्रमणको पूर्वसन्ध्यामा अमेरिकी सेनाको एसपीपी कार्यक्रममा सहभागिताको विषयलाई लिएर नेपालमा दलहरु विवादित बनेका छन् । एमालेले लगातार विरोध गर्दै आएको अवस्थामा सरकारले भने एसपीपीमा सहभागी नहुने प्रतिबद्धता जनाइसकेको छ ।

छलफलका क्रममा पार्टीको नीति महाधिवेशन, केन्द्रीय समितिको बैठक, विभाग गठन, भ्रातृ संस्थाको नेतृत्व चयन तथा पूर्णता दिने विषयमा पनि छलफल भएको थियो । देउवाले चाँडै कांग्रेसको केन्द्रीय समिति बोलाएर सबै विषयमा छलफल गर्ने बताएका थिए ।

थापा र शर्माले आगामी निर्वाचनमा विदेशमा रहेका नेपालीहरुले समेत मतदान गर्न पाउने व्यवस्था गर्नुपर्ने बताएका थिए । त्यसक्रममा पार्टी र सरकार सञ्चालन तथा सार्वजनिक सरोकारका विषयमा सभापति देउवाको ध्यानाकर्षण गराएको शर्माले बताए ।