सबै सूचक ऋणात्मक भएपछि शेयरबजार १९ सय अंकभन्दा तल ओर्लियो

६ असार, काठमाडौं । साताको दोस्रो कारोबार दिन सोमबार पनि शेयरबजार घट्ने क्रमले निरन्तरता पाएको छ । सोमबार बजार परिसूचक नेप्से ४९.३१ अंकले गिरावट भएर १८८४.८१ अंकमा बन्द भएको छ । सोमबार शेयरबजारको परिसूचक नेप्से १९ सय अंकभन्दा तल झरेको छ ।

४९. ३१ अंक घटेर परिसूचक १८८४ मा कायम भएको हो । यो अंक १९ महिना यताकै न्यून हो । कारोबार रकम अघिल्लो दिनको तुलनामा बढेको छ । आइतबार १ अर्ब १३ करोडको कारोबार भएकोमा सोमबार १ अर्ब ७५ करोडको भयो ।

सबै सूचकहरु ओरालो लागेका छन् । बैंकिङ २१, विकास बैंक १३५, फाइनान्स ४८, होटल तथा पर्यटन ५२, जलविद्युत ९३, जीवन बीमा २३४, उत्पादन ९१, लघुवित्त ११०, निर्जीवन बीमा २३९, अन्य ४९ र ब्यापार उपसमूह २२ अंक घटे । दुई कम्पनी आँधिखोला लघुवित्त र सीवाईसी नेपाल लघुवित्तको मूल्य १० प्रतिशत बढ्यो ।

४ कम्पनीको मूल्य बढ्दा १९१ को घट्यो । तेह्रथुम पावरको मूल्य १० प्रतिशत घट्यो । कालिका पावर, रिभर फल्स पावरको मूल्य ९ प्रतिशत घट्यो । प्रभु बैंक (संस्थापक), नेपाल टेलिकम, हिमालयन डिस्टिलरी, एनआईसी एसिया बैंक र नबिल बैंक कारोबार रकमका आधारमा क्रमशः अगाडि रहे ।

०७७ मंसिरमा २०७३ को बुलिस मार्केटले कायम गरेको १८८१ अंक पार गरेको नेप्से पुनः सोही अंकको नजिक आएर बन्द भएको छ । आज दिनभर बजारमा १९५ कम्पनीको ६१ लाख ८६ हजार ९४१ कित्ता शेयर किनबेच हुँदा १ अर्ब ७५ करोड ६ लाख रुपैयाँको करोबार भएको छ ।

जसमध्ये प्रभु बैंकको संस्थापक शेयर सर्वाधिक ११ करोड ८३ लाखको कारोबार हुँदा नेपाल दुरसञ्चार कम्पनीको १० करोड ९२ लाख र हिमालयन डिस्टिलरीको ५ करोड ७४ लाखको कारोबार भएको छ ।

आज कारोबार भएकामध्ये आँधिखोला लघुवित्तको शेयरमूल्य १० प्रतिशत र सीवाईसी नेपाल लघुवित्तको शेयरमूल्य ९.९८ प्रतिशतले बढेर सकारात्मक सर्किट लेभलमा बन्द हुँदा ओरियन्टल होटेलको शेयरमूल्य १.४१ प्रतिशत र गोर्खाज फाइनान्सको शेयरमूल्य ०.१३ प्रतिशतले बढेको छ ।