पूर्वका व्यवसायीले भने,‘अर्थमन्त्री चाँडो राजीनामा देऊ’

 १० असार,विराटनगर । पूर्वका उद्योगी व्यवसायीहरुले अर्थमन्त्री जनार्दन शर्माको राजीनामा मागेका छन् । उनीहरुले राजीनामा माग्दै शुक्रबार विराटनगरस्थित आन्तरिक राजश्व कार्यालय घेराउ गरेका छन् ।

विरोध जुलुस निकाल्दै ट्राफिक चोकस्थित कर कार्यालय अगाडि भेला भएका उद्योगी व्यवसायीले सीमित उद्योग पोस्न अर्थमन्त्री शर्माले करको दर हेरफेर गरेको आरोप लगाउँदै राजीनामा मागेका हुन् ।

नेपाल उद्योग संगठनका अध्यक्ष सुयश प्याकुरेलले अर्थमन्त्रीसँग आफूहरूले बारम्बार छलफल गरेको सुधार गर्ने भनेर आश्वासन दिएको, तर उद्योगीका माग सम्बोधन नगरिएको बताए । उद्योग बचाउनुको साटो तीनलाई नष्ट गर्नेगरी नीति ल्याइएर अर्थमन्त्रीले बारम्बार ढाँट्ने काम गरेको प्याकुरेलले बताए ।

कर कार्यालय अगाडि भएको विरोध सभामा बोल्दै नेपाल उद्योग परिसंघ प्रदेश नम्बर एकका अध्यक्ष भीम घिमिरेले राम्रा आश्वासन दिने, तर त्यसलाई व्यवहारमा कार्यान्वयन नगर्ने प्रवृत्ति अर्थमन्त्रीमा देखिएको बताए । उनले भने, “हामीले काठमाडौं गएर छलफल गर्यौँ माग पूरा हुन्छ भन्नुभयो, तर त्यसपछि पहिले जे थियो त्यही गरियो । हामीलाई मार पार्ने काम गरियो ।” घिमिरेले आफ्ना माग पूरा नहुन्जेल सडक संघर्ष गरिरहने बताए ।

मोरङ व्यापार संघका अध्यक्ष नवीन रिजालले अर्थमन्त्रीले समस्या समाधान गर्नपट्टि लाग्नुभन्दा यसलाई झन् बल्झाउने गरी कदम चालेको बताए । काठमाडौं छलफल गराएर अर्थमन्त्रीले उद्योग र उद्योगी बचाउन काम गर्छु भनेर झुक्याउने र ढाँट्ने काम भएको भन्दै अब सडक संघर्षकै बलमा अर्थमन्त्रीलाई राजीनामा गराएरै छाड्ने बताए ।

यस्तै, समाजवादी ट्रेड युनियनका मोहमत नसरुलले अर्थमन्त्री शर्मा एउटा उद्योगलाई पोस्नका निम्ति ९० करोड रुपैयाँमा बिकेको आरोप लगाउँदै उद्योगी र मजदुर सडकमा उत्रिँदा पनि अर्थमन्त्री चुपचाप बसको बताए । उनले अर्थमन्त्रीले राजीनामा नदिए आइतबारबाट राजमार्ग बन्द गर्ने आफूहरूको तयारी रहेको बताए ।