संसदप्रति उत्तरदायी हुन मन्त्रीहरूलाई राष्ट्रिय सभाका अध्यक्षको निर्देशन

१० असार, काठमाडौं । समयमै बैठकमा उपस्थित नभएको भन्दै राष्ट्रिय सभाका अध्यक्ष गणेशप्रसाद तिमल्सिनाले मन्त्रीहरूलाई बैठकमा समयमै उपस्थित हुन निर्देशन दिएका छन् । उनले मन्त्रीहरु संसदप्रति उत्तरदायी हुनुपर्ने बताएका छन् ।

शुक्रबारको राष्ट्रिय सभाको बैठकको सुरुवातमै अध्यक्ष तिमल्सिनाले मन्त्रीहरू संघीय संसद्प्रति उत्तरदायी हुने व्यवस्था गरेको र सदनमा उपस्थित भई आफ्नो कार्यसूची अघि बढाउन रुलिङ गरेका हुन् ।

उनले मन्त्रालयको कार्यसूची अघि बढाउन मद्दत गर्नु र उठेको प्रश्नको जवाफ दिनु सम्बन्धित मन्त्रीहरुको जिम्मेवारी भएको बताए । तिमल्सिनाले लोकतान्त्रिक व्यवस्थामा सार्वजनिक जवाफदेहिताको विशेष महत्व हुने भएकाले नेपाल सरकारका मन्त्रीहरुलाई तोकिएको ठीक समयमा उपस्थित भई जनता प्रति जवाफदेही बन्न रुलिङ गर्नुपरेको बताए ।