पार्टीले आत्मसम्मानमा चोट पुर्याएको भन्दै मन्त्री आलेले दिए ४८ घण्टाभित्र राजीनामा दिने चतावनी

१० असार, काठमाडौं । पर्यटन, संस्कृति तथा नागरिक उड्डयनमन्त्री प्रेम आलेले ४८ घण्टाभित्र पदबाट राजीनामा दिने चेतावनी दिएका छन् । उनले शुक्रबार नेकपा एकीकृत समाजवादीको पोलिटब्युरो बैठकमा पार्टी निर्णयप्रति असहमति राख्दै राजीनामा दिने जानकारी गराएका हुन् ।

उनले पार्टीले ६ महिनाका लागि सरकारमा पठाएको थियो र थप २ महिनामा पनि काम गर्ने अवसर दिएको भन्दै पछिल्लो समयमा फिर्ता गर्न छापामार शैलीमा निर्णय भएको बताए ।

आलेले पार्टीको पछिल्लो निर्णयले आफूहरूको आत्मसम्मानमा चोट पुगेको पनि बताए । उनले भने, ’त्यसले हाम्रो आत्मसम्मानमा चोट लगाउने काम भएको छ । पार्टीले गरेको निर्णयलाई मान्दै ४८ घण्टाभित्र राजीनामा दिन्छु ।’

एकीकृत समाजवादीले यसअघि नै चार मन्त्रीलाई फिर्ता गर्ने र अन्यलाई पठाउने सिफारिस गरे पनि निर्णय कार्यान्वयन हुन सकेको छैन । ४ मन्त्रीसहित १० सांसदहरुले असन्तुष्टि जनाउँदै शुक्रबार नै संसदीय दलको बैठक बोलाउन माग गरेका छन् ।