युवाको भविश्य प्रभावित भएको भन्दै सभामुखले देखाए नागरिकता विधेयकप्रति चासो

१२ असार,काठमाडौं ।  प्रतिनिधिसभाका सभामुख अग्निप्रसाद सापकोटाले धेरै युवाहरुको भविश्य प्रभावित भएको भन्दै नागरिकतासम्बन्धी विधेयक संसद्को चालु अधिवेशनबाट पारित गर्नुपर्ने बताएका छन् । उनले दलीय सहमति जुटाएर चाँडो विधेयक पास गराउन सम्बन्धित पक्षको ध्यानाकर्षणसमेत गराएका छन् ।

आइतबार बिहान संसदीय मामिला पत्रकार समाजले प्रकाशन गरेको ‘संसदीय समिति अभ्यास’ पुस्तक विमोचन कार्यक्रममा सापकोटाले नागरिकता विधेयक अड्किएका कारण आफूकहाँ दर्जनौँ ‘डेलिगसन’ आएको बताए । उनले विधेयक पारित नहुँदा दर्जनौँ युवाको भविष्यमा गाह्रो बनाएको बताए । यही सदनबाट नागरिकतासहित आठवटा प्रतिस्थापन विधेयक पास गर्नुपर्ने उनको भनाई छ ।

उनले गुणस्तरीय कानुन निर्माण गर्नेबाहेक आफूहरूको कुनै स्वार्थ नभएको बताए । कानुन निर्माण गर्ने मात्र होइन, गुणस्तरीय कानुन बनाउनु पनि संसदको दायित्व भएको भन्दै सभामुख सापकोटाले देशको सुशासन कायम गर्ने कानुन निर्माण गर्नुपर्नेमा जोड दिए ।

सापकोटाले सुशासन कायम र भ्रष्टाचार नियन्त्रण गर्ने बाहेक कुनै स्वार्थ नभएको बताए । आफ्नो आनिबानी, आचरण, देशभक्ति, सदाचारको एउटा नमूना दिनका लागि अग्रसर भएको उनको भनाइ छ ।

उनले अगाडि भने, ‘हामी भन्छौं लोकतन्त्र भनेको जीवनधारा हो, लोकतन्त्रको आत्मा भनेको संसद हो । तीन करोड नेपाली जनताहरुको आवाज प्रष्फुटन हुने कुनै फोरम छ भने त्यो संघीय संसद नै हो । त्यो संसदलाई कति हामी जीवन्त र जनमुखी बनाउन सक्छौं, अहिले हामीले त्यलाई एउटा सूत्रवाक्य बनाएका छौं । हामी निरन्तर, पूरै निष्ठाका साथ, पूरै इमानका साथ हामी लागेका छौं ।’