१ करोडकाे लागतमा आँधीखोलामा तटबन्धन गर्दै भीरकोट

♦ प्रकाश डोटेल

१९असार, स्याङ्जा । वर्षेनी वर्षासँगै आँधीखोलामा आएको बाढीलेखोला आसपासका खेतीयोग्य जमिनमा धेरै क्षती पु¥याउँदै आएको थियो । विगतका वर्षमा जस्तै वर्षासँगै आँधीखोलामा आएको बाढीले पु¥याउन सक्ने संभावित क्षती न्यूनिकरण गर्न भीरकोट नगरपालिकाले खोला तटबन्धन र व्यवस्थापनमा अग्रसरता देखाएको छ ।

जोखिममा रहेका खेतीयोग्य जमिनका आधारमा प्राथमिकीकरण गरी अस्थायी तटबन्ध गर्न लागिएको भीरकोट नगरपालिकाका प्रमुख गोविन्द कुमार कर्माचार्यले बताए । आँधीखोला किनारका भीरकोट नगर क्षेत्रभित्रका खेतीयोग्य जमिन बचाउन झण्डै १ करोड रकम खर्च गरेर काम थालेको नगरप्रमुख कर्माचार्यले बताए ।

भीरकोट नगरपालिकाले आउँदो बर्षको नीति तथा कार्यक्रममा पनि नदीजन्य प्रकोप नियन्त्रण एवं विपद् व्यवस्थापनलाई प्राथमिकतामा राखेको छ । नगरको पहलमा आँधीखोला किनारका दायाँबायाँ करिब १.५ किलोमिटर क्षेत्रमा अस्थायी तटबन्धन गर्ने काम शुरु भएको छ । मनसुन जन्यविपद् सुरु हुनु अगावै नगरपालिकाका र भाडाका डोजर तथा ट्रीपर प्रयोग गरेर तटबन्धन गरिएको छ ।

चालू आर्थिक वर्षको अन्त्यको समय भएपनि नगरसँग बजेटको अभाव छ । तर मनसुनजन्यविपद् जोखिम न्यूनीकरणका लागिनदी नियन्त्रण र तटबन्धनलाई प्राथमिकतामा राखेर काम गरेको नगरपालिकाका प्रवक्ता दिपेन्द्र के.सी.ले बताए । विगतमा आँधीखोलाले पकान र सिमलचौरको फाँटका क्षेत्रमा बढी क्षती पु¥याएकाले तत्कालका लागि तटबन्धन निर्माण कार्यलाई अगाडी बढाएको उनले सुनाए ।

“अस्थायी तटबन्ध व्यवस्थापनको काम भएपनि नदीजन्य प्रकोप नियन्त्रण र विपद् न्यूनीकरणमा ठूलो राहत मिल्ने विश्वास गरिएको छ ।” नगर प्रमुख कर्माचार्यले भने, “नयाँ आर्थिक वर्षका लागि आँधीखोलामा व्यवस्थित तटबन्धन र नदीकिनारमा हरित सडक निर्माण गर्न १ करोड रकम विनियोजन गरेका छौं ।” विपद् व्यवस्थापनमा नगरले २० लाख रुपैयाँ विनियोजन गरेकाले आँधीखोलाको दायाँबायाँको भाग सुरक्षित बनाउन सकिनेमा उनी दृढ देखिए ।

नगरपालिकाले तीन वटा डोजर र चारवटा ट्रीपर प्रयोग गरेर एक महिनाको अवधिमा सीमित स्रोत साधनका बावजुत नगरका१, २, ४ ,५ र ६ वडा अन्तर्गतका आँधीखोला नदी क्षेत्रको दाँयाबाँया १.५ किलोमिटर भित्र अस्थायी तटबन्धन गरिने छ । नगरले तटबन्धनको काम थालेपछि खोला किनारका कृषकहरु निर्वाध रुपमा धान रोप्न थालेका छन् ।

हाल सम्म झण्डै १ करोड बराबर लागतको काम भएको नगरपालिकाले जनाएको छ । आँधीखोलामा व्यवस्थित तटबन्धनका लागि प्रदेश र संघीय सरकारसँग पनि आवश्यक सहकार्यका लागि अनुरोध गरिएको नगरप्रमुख कर्मचार्यले जानकारी दिए । तटबन्धन व्यवस्थित नहुँदा सिमलचौर, पकान, बयरघारी, गैह्राथोक लगायतका फाँटहरु, सडक मार्ग र नदी किनारका बस्तीहरु सधैं जोखिममा पर्दै आएका छ्न् ।