स्याङ्जाका पालिकाको बजेट ७ अर्ब बढि

प्रकाश डोटेल

२० असार, स्याङ्जा । आर्थिक वर्ष २०७९/०८० को लागि स्याङ्जाका पालिकाले नीति तथा कार्यक्रम र बजेट पारित गरेका छन् ।अधिकांश पालिकाले पुरानै शैलीमा बजेट पेस गरेका छन् । भौतिक पूर्वाधार निर्माणमा अधिकांशले बढी बजेट विनियोजन गरेका छन् । उनीहरुले स्वास्थ्य, शिक्षा, खानेपानी, वन तथा वातावरण, संस्कृति तथा पर्यटन, खेलकुद, महिला, बालबालिकातथा ज्येष्ठ नागरिक, फोहोर व्यवस्थापन र नदी नियन्त्रणलाई प्राथमिकतामा राखेर बजेट विनियोजन गरेका छन् ।

आगामी आर्थिक वर्षका लागि जिल्लाका ११ पालिकाले ७अर्ब २ करोड ५२लाख ५३ हजार ८ सय बजेट पारित गरेका छन् । पारित बजेट मध्ये संघीय सरकार मार्फत ४ अर्ब ६६ करोड २४ लाख बजेट विनियोजन गरिएको छ भने स्थानीय पालिकाले २ अर्ब ३६ करोड २८ लाख ५३ हजार ८ सय आन्तरिक श्रोतबाट व्यवस्थापन गर्ने लक्ष्य राखेका छन् ।

सार्वजनिक बजेटमा सबैभन्दा धेरै वालिङ नगरपालिकाले ९१ करोड ८२ लाख २० हजार बराबरको बजेट पारित गरेको छ । पारित बजेटको ४५.८ प्रतिशत चालु तर्फ र ५४.२ प्रतिशत पूँजीगत खर्च तर्फ विनियोजन गरेको छ ।

पुतली बजारले ९० करोड ६४ लाख ८८ हजार बराबरको बजेट पारित गरेको छ । बजेट मध्ये ३० करोड ९७ लाख १५ हजार पुँजीगत खर्च र ५९ करोड ६७ लाख ७३ हजार चालुतर्फ नगर सभाले विनियोजन गरेको हो भने गल्याङ नगरपालिकाले ८२ करोड ५६ लाख ८२ हजार बराबरको बजेट घोषणा सँगै पारित गरेको छ ।

जिल्लाको पहिलो बालमैत्री नगरपालिका भीरकोटले ७५ करोड ४ लाख ३० हजारको बजेट पारित गरेको छ । पारित बजेटमा चालु खर्च तर्फ ४३ करोड १७ लाख ४८ हजार र पूँजीगत खर्चतर्फ १५ करोड ८६ लाख ८२ हजार रहेको छ । चापाकोट नगरपालिकाले चालु खर्चतर्फ ४० करोड ५३ लाख ५२ हजार र पुँजीगत तर्फ २० करोड ८१ लाख २६ हजार गरी ६१ करोड ३४ लाख७८ हजार बराबरको बजेट पारित गरेको छ ।

जिल्ला ६ गाउँपालिका मध्ये कालिगण्डकीले ५६ करोड ९१ लाख ५० हजार बराबरको बजेट पारित गर्दा चालुतर्फ ३२ करोड २५ लाख ५५ हजार र पुँजीगततर्फ २४ करोड ६५ लाख ९५ हजार विनियोजन गरेको छ ।आँधीखोला गाउँपालिकाले ७१ करोड १८ लाख बराबरको बजेट पारित गरेको छ ।

बिरुवाले ४९ करोड ३ लाख बराबरको अनुमानित बजेट पारित गर्दा चालू खर्चतर्फ ३१ करोड ४७लाख ८० हजार र पूँजीगततर्फ १७ करोड ५५ लाख २० हजार रकम विनियोजन गरेको छ । अर्जुनचौपारी गाउँपालिकाले ४४ करोड १८ लाख १९ हजार बराबरको बजेट पारित गरेको छ । १४ करोड ३३ लाख ८९ हजार पूँजीगत तर्फ अनुमानित गर्दा चालु खर्चतर्फ ७ करोड ३९ लाख ३० हजार र सशर्त अनुदानमा १८ करोड ४५ लाख रकम विनियोजन गरेको छ ।

जिल्लाका १० पालिकाले तोकिएकै समय सिमाभित्र बजेट प्रस्तुत गरेर पारित गर्दा हरिनास गाँउपालिकाले केहिदिन ढिला गरी बजेट प्रस्तुत गर्दै पारित गरेको छ । हरिनासले ४१ करोड ८७ लाख ८० हजार बराबरको बजेट पारित गरेको छ । उता फेदिखोलाले ३७ करोड ९० लाख ९६ हजार ८ सय बराबरको बजेट प्रस्तुत गरेसँगै पारित गरेको जनाएको छ ।

अधिकांश पालिकाले नीति तथा कार्यक्रममा सडक र पुर्वाधारमा पहिलो प्राथमिकता दिएर बजेट ल्याएका छन् । कृषि, स्वास्थ्य र शिक्षामा समेत प्राथमिकता राख्दै धेरै पालिकाले बजेट विनियोजन गरेका छन् । अधिकांश पालिकाको नीति तथा कार्यक्रम अनुसार बजेटको तालमेल नदेखिएको जानकारी बताउँछन् ।