स्याङ्जामा वार्षिक १० करोड बढी कारोबार गर्ने २२ व्यवसायी

♦ प्रकाश डोटेल

२१ असार, स्याङ्जा । कर प्रणालीलाई क्रमश डिजिटल प्रणालीमा रुपान्तर गर्ने उद्देश्य अनुरुप सरकारले साउन एकदेखि वार्षिक १० करोड बराबरको कारोबार गर्ने व्यवसायीहरु अनिवार्य अनलाइन बिलिङ्मा जार्नुपर्ने बनाएको छ । आर्थिक वर्ष २०७९/०८० को सुरुदेखि विद्युतीय माध्यमबाट बीजक जारी गर्नुपर्ने छ । तर, सो भन्दा कम कारोबार गर्ने व्यवसायीलाई भने स्वेच्छिक छ ।

स्याङ्जाका केही व्यवसायीले यसअघि समेत अनलाइन बिलिङ गर्दै आएको जनाएका छन् । जिल्लामा वार्षिक १० करोडभन्दा माथिको कारोबार गर्ने २२ जना व्यवसायी मात्रै छन् । उनीहरु मार्फत वार्षिक २ अर्ब ७४ करोड १६ लाख रुपैयाँ बराबरको आर्थिक कारोबार हुने गरेको छ ।

जिल्लामा ठुल्ठूला उद्योग व्यवसाय, कल कारखाना छैनन् । वार्षिक १० करोड कारोबार गर्नेहरुमा पेट्रोल पम्प, वितरक, निर्माण व्यवसायी, मोटर पार्टस सप्लायर्स र हार्डवेयर व्यापारी हुन् । तर, ५ करोडसम्मका कारोबारी भने ६० देखि ७० जना रहेको उद्योग वाणिज्य संघ स्याङ्जाका अध्यक्ष रविन्द्रमान श्रेष्ठले बताए । सो रकम भ्याट बाहेकको रहेको उनले जानकारी दिए ।

अनलाइन बिलिङ गर्दा कर तथा लेखा प्रणालीलाई पारदर्शी, व्यवस्थित, विश्वसनीय बनाउनुका साथै काममा सहजता र कर सहभागिता लागत कम लाग्ने अध्यक्ष श्रेष्ठले बताए । “सामान्यतया करोडौंको कारोबार गर्ने व्यवसायी अब प्रविधिमैत्री बन्नैपर्छ ।” श्रेष्ठले भने, “प्रविधिको उपयोगले व्यवसायीलाई हित गर्ने र प्रविधि उपयोगमा सहजग रहनु आजको आवश्यकता हो ।”

व्यवसायीलाई अनलाईन बिलिङ्मा जानुपर्ने भएपछि जिल्ला उद्योग वाणिज्य संघले वार्षिक १० करोड भन्दा बढी कारोबार गर्ने जिल्लाका व्यवसायीलाई प्रशिक्षण दिएको छ । संघको आयोजना र करदाता सेवा कार्यालयको समन्वयमा विद्युतीय माध्यमबाट बीजक जारी गर्ने व्यवस्थाका बारेमा व्यवसायीलाई जानकारी गराइएको छ ।

करदाता कार्यालय प्रमुख शोभाकान्त पंगेनीले आउँदो आर्थिक वर्षदेखि वार्षिक १० करोडभन्दा माथिका कारोबार गर्ने व्यवसायीले अनिवार्य अनलाइन बिलिङ् गर्नुपर्ने भएकाले सबै व्यवसायीले राज्यका नीति बमोजिम काम गर्न आग्रह गरेका छन् ।

अनलाइन बिलिङ्ले व्यवसाय पारदर्शि हुने भएकाले यस्ता नीति अवलम्बन गरिएको उनको भनाइ छ । विद्युत्तीय उपकरणबाट सामान खरिद र बिक्रीसम्बन्धी कारोबार गर्नेगरी नीतिगत व्यवस्था र यसका प्रक्रियाका बारेमा प्रमुख पंगेनीको सहजीकरण गरेका थिए ।

उनले विद्युतीय माध्यमबाट बीजक जारी गर्ने व्यवस्थाका बारेमा कार्यपत्र प्रस्तुत गर्दै विधि, प्रक्रिया र पद्धतिकाबारेमा जानकारी गराए । प्रशिक्षणमा १० करोडभन्दा माथि कारोबार गर्ने जिल्लाका व्यवसायीहरुको सहभागिता रहेको संघका सचिव मित्रबन्धु पोखरेलले बताए ।