कांग्रेसले बनायो नयाँ मर्यादाक्रम, वरिष्ठ नेताको पद खारेज हुँदा पौडेल पुगे पदाधिकारीभन्दा तल

२८ असार,काठमाडौं । नेपाली कांग्रेसले नयाँ मर्यादाक्रम तयार गरेर त्यसको मस्यौदामाथि मंगलबारबाट छलफल सुरु गरेको छ । मस्यौदा अनुसार मर्यादाक्रम लागू भएमा हाल सभापतिभन्दा पछि रहेका वरिष्ठ नेता रामचन्द्र पौडेल पदाधिकारीभन्दा तल पर्ने भएका छन् ।मर्यादाक्रमबारे कांग्रेसभित्र विवाद भएपछि नयाँ मर्यादाक्रम निर्धारण गरी छलफलमा ल्याइएको हो । केन्द्रीय कार्य समितिको मंगलबारको बैठकमा नयाँ मर्यादाक्रम निर्धारणका लागि मस्यौदा प्रस्तुत भएको छ ।

१४ औँ महाधिवेशनमा सभापतिमा पराजित भएका डा. शेखर कोइरालालाई वरिष्ठ नेतामा स्वीकार नगर्ने सभापति शेरबहादुर देउवाको रणनीतिअनुसार यो मर्यादाक्रम बनाइएको हो । नयाँ मर्यादाक्रम लागुभएपछि वरिष्ठको पद रहने छैन।

कोइरालाका कारण यसअघि मर्यादाक्रममा को माथि वा तल हुने भन्नेबारे नेताहरूबीच विवाद भएपछि सभापति देउवाले सहमहामन्त्रीहरू जीवन परियार, डिना उपाध्याय र बद्री पाण्डेलाई मर्यादाक्रमको मस्यौदा तयारी गर्ने जिम्मेवारी दिएका थिए ।

सहमहामन्त्रीत्रय परियार, उपाध्याय र पाण्डेले मर्यादाक्रमको मस्यौदा तयार गरी केन्द्रीय कार्यसमितिको बैठकमा पेश गरेका हुन् ।मंगलबारको बैठकमा सहमहामन्त्री बद्री पाण्डेले मर्यादाक्रमको मस्यौदा छलफलका लागि प्रस्तुत गरेका हुन् । उनले विधानले व्यवस्था गरेको तहगत संरचनाको आधार, पदाधिकारी, सदस्यको मर्यादाक्रम, सरकारको मर्यादाक्रम र वर्तमान तथा भूतपुर्व पदको आधारलाई मर्यादाक्रम निर्धारणको मस्यौदाले तय गरेको बताएका छन् ।

मस्यौदाअनुसार कांग्रेसमा वरिष्ठ नेता हुने व्यवस्था हटाइएको छ । हाल सभापति देउवाले महाधिवेशनमा सहयोगी बनेका नेता रामचन्द्र पौडेललाई वरिष्ठ नेताको रुपमा दोस्रो वरियतामा राखेका छन् ।

प्रस्तावित मस्यौदाअनुसार मर्यादाक्रमको सबैभन्दा माथि केन्द्रीय सभापति हुने, र त्यसपछि क्रमशः पुर्वकेन्द्रीय सभापति, प्रधानमन्त्री, पूर्वप्रधानमन्त्री र संसदीय दलको नेता हुने व्यवस्था छ । मर्यादाक्रममा त्यसपछि पार्टीका केन्द्रीय पदाधिकारी हुन्छन् । यस आधारमा अब सभापति देउवापछि मर्यादाक्रममा उपसभापतिहरू हुनेछन् ।

यसअघि महाधिवेशनमा सभापतिपछि सबैभन्दा धेरै मत ल्याउने नेतालाई सभापतिपछिको वरीयतामा राख्ने अभ्यास रहेको थियो । तर, यसपटक सभापति देउवाले सभापतिमा पराजित नेता शेखर कोइरालालाई दोस्रो नम्बरमा राख्न अस्वीकार गरेपछि मर्यादाक्रमबारे विवाद उत्पन्न भएको थियो ।