गाँउपालिका जलचर संरक्षण अभियानमा

२८ असार, स्याङ्जा । अर्जुनचौपारी गाउँपालिकाले जलचर (माछा) संरक्षण गर्ने अभियान संचालन गरेको छ । गाँउपालिकाको मध्यभागबाट बग्ने दरौखोलामा बिभिन्न जातका १० हजार माछाका भुरा छोडेर जलचरको संरक्षण अभियानको शुरुवात गरेको हो । मत्य बिकास केन्द्र मिर्मीको सहयोगमा अर्जुनचौपारी पालिकाले रहु जातका माछा तीन हजार, नैनी जातका तीन हजार र गरदी जातका माछा चार हजार भुरा दरौखोलामा संरक्षणका लागि छोडेको जनाएको छ ।

दरौखोला, केवरेखोला र दिर्जे खोलालाई माछापालनबाट आर्थिक आर्जनमा पनि जोड्न सकिने र माछाको संरक्षण पनि हुने भएकाले पालिकाको पहलमा माछाका भुरा छाडिएको गाँउपालिका अध्यक्ष प्रकाश तिवारीले बताए । जलचरको संरक्षणमा पालिका लाग्ने नीति तथा कार्यक्रम गाँउपालिकाले ल्याएको थियो ।

अबको १५ दिनमा थप पाचँ हजार माछाका भुरा छोडिने र खोलालाई पालिकाको आर्जनका माध्यम बनाउने तिवारीले बताए । पछिल्लो समय खोला दोहन गर्नेक्रम बढेको छ अध्यक्ष तिवारीले भने,‘जसले गर्दा जलचर लोभ हुने अवस्थामा पुगेको छ ।’ जलचरको संरक्षण पनि हुने आम्दानीको श्रोत पनि हुने भएकाले यो अभियानको थालनी गरेका हौं उनले भने ।

धेरै ठाउँमा खोलालाई माछा मार्फत आय आर्जनमा जोडिएको र बिज्ञ सगँको छलफल गरेर खोलामा माछाका भुरा छाडेको बताउदै अध्यक्ष तिवारीले पालिकाले खोलाको तीन किलोमिटर क्षेत्रमा चार ठाउँमा भुरा हालेको बताए । पालिकाले आगामी आर्थिक बर्षमा एक लाख भुरा खोलामा छाड्ने योजना बनाएको छ ।

खोलमा माछाका भुरा हालेसगै पालिकाले कुनै पनि तवरले खोलाका माछा मार्ने कार्य निषेध गरिएको प्रमुख प्रशासकीय अधिकृत उज्ज्वल बहादुर बस्नेतले बताए । परम्परागत रुपले माछा मारी जीविकोपार्जन गरिरहेका समुदाय तथा व्यक्तिहरुले समेत माछा मार्न नपाउने र दैनिक जीविको पार्जनमा कठिनाई उत्पन्न हुने अवस्था आईपरेमा पालिकाले राहत उपलब्ध गराउने उनले बताए ।

जीविको पार्जनमा कठिनाइ भएका व्यक्ती वा समुदायलाई पालिकाकामा राहतका लागि निवेदन दिन पालिकाले सूचित समेत गरेको छ । पालिकाले जिल्ला प्रशासन कार्यालय, भीरकोट नगरपालिकाको कार्यालय र अर्जुनचौपारी प्रहरी चौकीलाई समेत माछा मार्न निषेध गरिएको विषयमा जानकारी गराउँदै आवश्यक सहयोगका लागि आग्रह गरेको छ । पालिकाको आग्रह र निर्देशन विपरीत माछा मारेको भेटिएमा वा खबर पाईएमा कानून बमोजिम कारवाही गरिने व्यहोराको सुचना जारी गरिएको पालिकाले जनाएको छ ।