शेयरबजारमा बुधबार पनि सुधार, तीन कम्पनीको मूल्यमा सकारात्मक सर्किट

२९ असार, काठमाडौं । शेयरबजारमा बुधबार पनि सुधार देखिएको छ । आज नेप्से परिसूचक ५९.५४ अंकले बढेको छ । यससँगै नेप्से परिसूचक १९८६.८२ विन्दुमा आएको छ । ३ कम्पनीको मूल्यमा सकारात्मक सर्किट लाग्दा करिब २ अर्ब रुपैयाँको शेयर कारोबार भएको छ ।

असार मसान्त नजिकिँदै जाँदा बजारमा चमक आएको हो । यसअघि १८०७ विन्दुसम्म झरेको नेप्से सुधार भएर करिब २१ सय विन्दु आसपास पुगेको थियो । त्यसपछि फेरि बजारमा करेक्सन आयो । करेक्सनपछि बजारमा फेरि चमक आएको हो ।

बजारको दिगो सुधारका लागि वित्तीय प्रणालीमा पर्याप्त तरलता र ब्याजदर सस्तो हुनुपर्छ । यसैगरी, आम लगानीकर्ताहरुको मनोविज्ञान पनि सकारात्मक हुन आवश्यक छ । शेयरबजारमा उचारचढाव भइरहन्छ । यो बजारको स्वभाविक प्रक्रिया हो । बढेको बजार घट्न पनि सक्छ । शेयरबजारमा अवसरसँगै जोखिमको सम्भावना पनि अधिक हुन्छ भन्ने कुरालाइ ख्याल गर्दै लगानीसम्बन्धी निर्णय लिनुपर्ने हुन्छ ।

बुधबार २२५ कम्पनीको ५७ लाख ८७ हजारभन्दा बढी कित्ता शेयर कारोबार भएको छ । सबै समूहका सूचकमा हरियाली छाएको छ । ९ करोड रुपैयाँभन्दा बढी कारोबार रकममा शिवम् सिमेन्ट्स अग्रस्थानमा रहेको छ । यसैगरी, दोस्रो र तेस्रो स्थानमा क्रमशः एनआईसी एसिया र नेपाल बैंक परेका छन् ।