देश बनाउने भनेको राजनीतिक दलहरुले नै हो, कुनै व्यक्ति आएर बन्दैनः ओली

२९ असार, काठमाडौं । नेकपा एमालेका अध्यक्ष केपी शर्मा ओलीले केहीले गलत काम गरेका कारण राजनीतिक दलहरुलाई गाली गर्ने चलन बढ्दै गएपनि देश बनाउने र चलाउने भनेको दलहरुनै भएको बताएका छन् । उनले यो प्रक्रिया निरन्तर चलिरहने दावीसमेत गरेका छन् ।

काठमाडौंमा बुधबार मानवअधिकार एलायन्सद्वारा आयोजित कार्यक्रममा अध्यक्ष ओलीले कुनै व्यक्ति आएर देश चलाउने कल्पना गर्नु र बनाउँछु भन्नु कल्पनाभन्दा बाहिरको विषय भएको बताए । ओलीले राजनीतिक दलको आवश्यकता हिजो पनि रहेको, आज पनि चलाइरहेको र भोलि पनि दलहरुले नै चलाउने दावी गरे ।

पूर्वप्रधानमन्त्रीसमेत रहेका ओलीले अहिले राजनीतिक दलहरूको योगदानप्रति घृणा फैलाउने प्रवृत्ति चलेको भन्दै त्यसप्रति असन्तुष्टि व्यक्त गरे । राजनीतिक दलहरूले लामो समय संघर्ष र योगदान गरेर परिवर्तन र रुपान्तरण गरेको भन्दै कुनै पनि राजनीतिक दलले सत्तामा पुगेर मानव अधिकार रक्षा गर्न सक्ने उनले बताएका थिए ।

गत वैशाखको स्थानीय तह र आगामी संघीय निर्वाचनमा स्वतन्त्र उम्मेदवारहरूलाई लक्षित गर्दै उनले राजनीतिक दलहरूले परिवर्तन गर्नसक्ने बताएका थिए । साथै अहिले दलीय प्रणाली सर्वमान्य व्यवस्था रहेको उनको भनाइ थियो ।